ប្រធានាធិបតីសហរដ្ឋអាមេរិកថ្លែងថា លោកបានជួបជាមួយមេដឹកនាំរុស្ស៊ី លោក វ្លាឌីមៀ ពូទីន ក្នុងរយៈពេលវែងមួយ ហើយជជែកគ្នាបានផលល្អច្រើន។
លោកត្រាំ បានថ្លែងក្នុងបទសម្ភាសន៍ជាមួយបណ្តាញផ្សព្វផ្សាយអ្នកកាន់សាសនាគ្រឹស្តប៉ុន្មានថ្ងៃក្រោយពេល លោកជួបជាមួយលោក ពូទីន នៅក្នុងកិច្ចប្រជុំកំពូលប្រទេស G20 នៅក្នុងទីក្រុង Hamburg ប្រទេសអាល្លឺម៉ង់។នេះបើតាមសារព័ត៌មាន BBC។
ប្រធានាធិបតីអាមេរិកថ្លែងថា លោកគិតថា លោក ពូទីន ប្រហែលរំពឹងថា លោកស្រី ហ៊ីលឡារី គ្លីនតុន ជាអ្នកបានតំណែងនៅសេតវិមាន។
មានការស៊ើបអង្កេតជាច្រើនដែលផ្តោតលើការចោទថា រុស្ស៊ីជាអ្នកនៅពីក្រោយក្នុងការជួយឲ្យលោក ដូណល ត្រាំ ឈ្នះការបោះឆ្នោត ប៉ុន្តែលោក ត្រាំ ច្រានចោលការសំអាងហេតុទាំងនោះ ចំណែករុស្ស៊ីក៏បានច្រានចោលជាញឹកញាប់លើករណីចោទប្រកាន់នេះដែរ។
លោកត្រាំ បញ្ជាក់ថា ជំនួបនេះដែលពិភពលោកនឹកស្មានមិនដល់ថា មហាអំណាចនុយក្លេអ៊ែទាំងពីរអាចមានទំនាក់ទំនងល្អដូច្នេះទេ។ លោកថា ការផ្អាកផ្ទុះអាវុធនៅភាគនិរតីនៃប្រទេសស៊ីរីនោះគឺជាការបង្ហាញថា មានកិច្ចសហការល្អពីលោក ពូទីន ហើយ៕