ក្រសួងការបរទេសសហរដ្ឋអាមេរិក បានស្នើឲ្យប្រទេសនានាផ្តល់ទិន្នន័យឬឈ្មោះអ្នកដែលត្រូវបានហាមឃាត់ការធ្វើដំណើរ ដើម្បីយកទៅធ្វើជាមូលដ្ឋានក្នុងការពិចារណាផ្តល់ទិដ្ឋការឲ្យឬយ៉ាងណាក្នុងគោលបំណងប្រុងប្រយ័ត្នលើក្រុមភេរវកម្ម។ នេះបើតាមទីភ្នាក់ងារព័ត៌មានរ៉យទ័រ។
សំណើបញ្ជាក់ថា បើសិនជាប្រទេសនានាមិនបានឆ្លើយឬបំពេញតាមពិធីសារការទូតថ្មីនេះក្នុងរយៈពេល៥០ថ្ងៃ ប្រឈមនឹងការដាក់ទណ្ឌកម្មលើការធ្វើដំណើរ។
លិខិតស្នើសុំនេះ ត្រូវបានផ្ញើទៅកាន់ស្ថានទូតរបស់អាមេរិកនៅទូទាំងពិភពលោកកាលពីថ្ងៃពុធ ដើម្បីផ្តល់ទៅកាន់រដ្ឋពាក់ព័ន្ធទាំងនោះ។ ប្រធានាធិបតីអាមេរិកលោក ដូណល ត្រាំ បានដាក់ចេញនូវវិធានការហាមឃាត់ពលរដ្ឋនៃប្រទេសចំនួន៦ដែលកាន់សាសនាឥស្លាមមិនឲ្យចូលដែនដីអាមេរិកក្រោមហេតុផលពង្រឹងសន្តិសុខសណ្តាប់ធ្នាប់។
បំណងរបស់អាមេរិកនោះគឺទាមទារឲ្យប្រទេសនានាលើកឡើងបញ្ហារបស់អ្នកធ្វើដំណើរដូចជា បញ្ហាតែងកើតមានឡើង បញ្ហាលើលិខិតឆ្លងដែន ការបាត់លិខិតឆ្លងដែន និងបទឧក្រិដ្ឋផ្សេងទៀតដែលត្រូវបានប្តឹទៅកាន់នគរបាលអន្តរជាតិជាដើម៕