ប្រធានាធិបតីបារាំង លោក អេម៉ានុយអ៊ែល ម៉ាក្រុង និងប្រធានាធិបតីអាមេរិក លោក ដូណាល់ ត្រាំ បានប្រារព្ធបុណ្យជាតិបារាំងរួមគ្នា កាលពីថ្ងៃម្សិលមិញនេះ ដោយមានព្យុហយាត្រាកងទ័ព ដែលជាការផ្ដល់កិត្តិយសដល់មេដឹកនាំអាមេរិក និងជាការបង្ហាញនូវទំនាក់ទំនងដ៏កក់ក្ដៅរវាងមេដឹកនាំទាំងពីររូបនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ប៉ុន្តែ ពិធីនេះក៏ភ្ជាប់ជាមួយការកាន់ទុក្ខផងដែរ ជាការគោរពទៅដល់ជនរងគ្រោះ ៨៦នាក់ ត្រូវបានភេរវជនសម្លាប់កាលពីមួយឆ្នាំមុន នៅទីក្រុងនីស ស្ថិតនៅភាគខាងត្បូងប្រទេសបារាំង។
លោក ត្រាំ គឺជាភ្ញៀវកិត្តិយសរបស់លោក ម៉ាក្រុង នៅក្នុងពិធីបុណ្យជាតិនៅទីក្រុងប៉ារីស ខណៈដែលថ្ងៃនេះក៏ជាថ្ងៃរំលឹកដល់កងទ័ពអាមេរិកស្លាប់បាត់បង់ជីវិតនៅក្នុងសង្គ្រាមលោកលើកទី១ផងដែរ។
ព្យុហយាត្រាកងទ័ព បានបង្ហាញនូវក្បួនកងទ័ពបារាំង និងអាមេរិក ដែលធ្វើដំណើរយឺតៗនៅវិមានប្រធានាធិបតីបារាំង រួមទាំងការសម្ដែងរបស់យន្តហោះចម្បាំងផងដែរ។
កងទ័ពអាមេរិកដែលស្ថិតក្នុងឈុតពណ៌ត្នោត ក៏ស្ថិតក្នុងចំណោមទាហានបារាំង ៣៧២០នាក់ នៅក្នុងក្បួនព្យុហយាត្រានោះផងដែរ៕