ប្រទេសជប៉ុន កាលពីថ្ងៃម្សិលមិញនេះ បាននិយាយបន្ធូបន្ថយស្ថានការណ៍ ជាការឆ្លើយតបទៅនឹងសំណើរបស់កូរ៉េខាងត្បូងដែលបានស្នើឲ្យមានជំនួបពិភាក្សាខាងយោធាជាមួយកូរ៉េខាងជើង ដោយជប៉ុនថា អាទិភាពនៅពេលនេះ គួរតែផ្ដោតទៅលើការដាក់សម្ពាធទៅលើក្រុងព្យុងយ៉ាងតាមរយៈទណ្ឌកម្ម។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្នុងកិច្ចប្រជុំស្ដីពីការអភិវឌ្ឍរបស់អង្គការសហប្រជាជាតិ អ្នកនាំពាក្យក្រសួងការបរទេសជប៉ុន លោក ណូរីអូ ម៉ារុយ៉ាម៉ា ត្រូវបានដកស្រង់សម្ដី ដែលបាននិយាយថា នេះមិនមែនជាពេលវេលាសម្រាប់ពិភាក្សាគ្នាទេ ប៉ុន្តែ វាជាពេលវេលាសម្រាប់ដាក់សម្ពាធ។
លោកបន្តថា នេះជាពេលបង្កើនសម្ពាធដើម្បីធ្វើការពិភាក្សាគ្នា។
ក្រសួងការពារជាតិកូរ៉េខាងត្បូង បានស្នើឲ្យមានកិច្ចប្រជុំមួយដែលធ្វើឡើងនៅថ្ងៃសុក្រខាងមុខនេះ នៅឯព្រំដែនកូរ៉េទាំងពីរ ដើម្បីរំសាយភាពតានតឹង ក្រោយពីក្រុងព្យុងយ៉ាង បានបាញ់សាកល្បងគ្រាប់មីស៊ីលឆ្លងទ្វីបជាលើកដំបូងរបស់ខ្លួន៕