នាយករដ្ឋមន្ត្រីជប៉ុន លោក ហ្ស៊ិនហ្ស៊ូ អាបេ បាននិយាយនៅថ្ងៃនេះថា សហគមន៍អន្តរជាតិ ត្រូវតែដាក់សម្ពាធលើកូរ៉េខាងជើង ជុំវិញការបាញ់សាកល្បងគ្រាប់មីស៊ីលជាថ្មីម្ដងទៀតរបស់ប្រទេសនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
លោក អាបេ បានប្រាប់អ្នកយកព័ត៌មានក្រោយកិច្ចប្រជុំជាមួយសមាជិកគណៈរដ្ឋមន្ត្រីថា ការបាញ់គ្រាប់មីស៊ីលកាលពីយប់ថ្ងៃសុក្រ ដែលកើតឡើងក្រោយការបាញ់គ្រាប់មីស៊ីលឆ្លងទ្វីបនាពេលថ្មីៗក្នុងខែនេះនោះ បានបង្ហាញថា ការគំរាមកំហែងទៅលើសន្តិសុខជប៉ុន កាន់តែច្បាស់ឡើង និងកាន់តែធ្ងន់ធ្ងរឡើង។
លោកថ្លែងថា ដរាបណាកូរ៉េខាងជើងបន្តសកម្មភាពបង្កហេតុ មានតែរក្សាទំនាក់ទំនងជិតដិតជាមួយសហគមន៍អន្តរជាតិ ចាប់ផ្ដើមពីអាមេរិក កូរ៉េខាងត្បូង ចិន និងរុស្ស៊ី និងពង្រឹងការដាក់សម្ពាធបន្ថែមទៀត៕
