កូរ៉េខាងជើង បានធ្វើតេស្តគ្រាប់មីស៊ីលឆ្លងទ្វីបជាលើកទីពីររបស់ខ្លួននៅក្នុងខែនេះ ដោយបង្កើនការគំរាមកំហែងការវាយប្រហារទៅលើទឹកដីអាមេរិក នៅចំពេលដែលមានការព្រមានកាន់តែខ្លាំងពីប្រធានាធីបតី ដូណាល់ ត្រាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក ត្រាំ បានបរិហារការបាញ់សាកល្បងគ្រាប់មីស៊ីល ដោយចាត់ទុកជាទង្វើគឃើ្លន និងគ្រោះថ្នាក់ ហើយបានទាត់ចោលនូវការអះអាងពីសំណាក់ក្រុងព្យុងយ៉ាងថា ការសាកល្បងនោះ អាចជួយធានាសន្តិសុខរបស់ខ្លួន។
លោក ត្រាំ បាននិយាយក្នុងសេចក្ដីថ្លែងការណ៍មួយថា តាមរយៈការគំរាមកំហែងពិភពលោក សព្វាវុធទាំងនោះ និងការធ្វើតេស្តគ្រាប់មីស៊ីល នឹងកាត់ផ្ដាច់កូរ៉េខាងជើងឲ្យកាន់តែឯកោ ធ្វើឲ្យសេដ្ឋកិច្ចកាន់តែចុះទន់ខ្សោយ ហើយធ្វើឲ្យប្រជាជនកាន់តែលំបាកវេទនា។
លោក ត្រាំ បន្តថា អាមេរិកនឹងចាត់វិធានការចាំបាច់ទាំងអស់ ដើម្បីធានាសន្តិសុខដល់ទឹកដីអាមេរិក និងការពារសម្ព័ន្ធមិត្តរបស់ខ្លួននៅក្នុងតំបន់។
ក្រុមអ្នកតាមដានកូរ៉េខាងត្បូង អាមេរិក និងជប៉ុន សុទ្ធតែចាប់បានសញ្ញានៃការតេស្តគ្រាប់មីស៊ីលកាលពីយប់មិញនេះ៕
