អាជ្ញាធរអូស្ត្រាលីបាននិយាយនៅថ្ងៃនេះថា ពួកគេបានបញ្ឈប់ “ផែនការភេរវកម្ម”មួយ ដែលប៉ុនប៉ងបំផ្ទុះយន្តហោះ បន្ទាប់ពីមនុស្ស ៤នាក់ ត្រូវបានចាប់ខ្លួននៅក្នុងប្រតិបត្តិការបង្ក្រាបនានានៅទីក្រុងស៊ីដនី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
នាយករដ្ឋមន្ត្រីអូស្ត្រាលី លោក Malcom Turnbull បានប្រាប់ក្រុមអ្នកសារព័ត៌មានថា លោកអាចរាយការណ៍អំពីយប់មិញនេះថា មានប្រតិបត្តិការប្រឆាំងភេរវកម្មដ៏ធំមួយ ដើម្បីកាត់ផ្ដាច់ផែនការបំផ្ទុះយន្តហោះមួយគ្រឿង។
លោកបន្ថែមថា បញ្ហាសន្តិសុខ ត្រូវបានរឹតបន្តឹងនៅតាមព្រលានយន្តហោះសំខាន់ៗទាំងអស់ ដោយអ្នកដំណើរត្រូវបានប្រាប់ឲ្យធ្វើដំណើរទៅដល់ព្រលានយន្តហោះបាន ២ម៉ោងមុនពេលស្គែន។
ក្រុមមន្ត្រីមិនបានបញ្ជាក់ឲ្យច្បាស់ទេថា តើផែនការវាយប្រហារនោះសំដៅទៅលើជើងហោះហើរក្នុងស្រុក ឬជើងហោះហើរអន្តរជាតិ ប៉ុន្តែ សារព័ត៌មានអូស្ត្រាលីមួយបានចុះផ្សាយថា ជើងហោះក្នុងស្រុកជាគោលដៅនៃការវាយប្រហារ។
ស្នងការនគរបាលសហព័ន្ធអូស្ត្រាលី លោក Andrew Colvin បាននិយាយថា មនុស្សទាំង ៤នាក់ ដែលត្រូវចាប់ខ្លួនបានកាលពីថ្ងៃម្សិលមិញនោះ ត្រូវបានសង្ស័យថាមានពាក់ព័ន្ធនឹងផែនការវាយប្រហារយកលំនាំតាមក្រុមឥស្លាម៕
