ម៉ាឡេស៊ីនៅថ្ងៃចន្ទនេះ បានជំរុញឲ្យអង្គការសហប្រជាជាតិទទួលបន្ទុកជនភៀសខ្លួន ផ្តល់របាយការណ៍មួយចំនួនក្នុងចំណោមជនភៀសខ្លួន និង អ្នកស្វែងរកសិទ្ធិជ្រកកោន ១៥០ ០០០នាក់ ដែលបានចុះបញ្ជីស្របពេលប្រទេសនេះកំពុងបារម្ភខ្លាំងពីក្រុមបង្កភេរវកម្ម។
អនុរដ្ឋមន្ត្រីក្រសួងមហាផ្ទៃរបស់ម៉ាឡេស៊ីលោក Nur Jazlan ថ្លែងប្រាប់សារព័ត៌មាន Channel News Asia ថា បច្ចុប្បន្នអាជ្ញាធរកំពុងបារម្ភខ្លាំងពីការហូរចូលក្រុមឧទ្ទាមIS ដែលអាចចូលតាមរយៈរូបភាពក្រុមជនភៀសខ្លួន ដែលទទួលបានកាតពីឧត្តមស្នងការអង្គការសហប្រជាជាតិទទួលបន្ទុកសិទ្ធិជនភៀសខ្លួន។
លោកថា អង្គការសហប្រជាជាតិជាអ្នកផ្តល់កាតទទួលស្គាល់ជនភៀសខ្លួន ដែលមិនមានទំនាក់ទំនងជាមួយក្រសួងមហាផ្ទៃកាលពីពេលកន្លងទៅ ហើយចំនួនជនភៀសខ្លួននៅក្នុងប្រទេសម៉ាឡេស៊ីចេះតែមានការកើនឡើង ដែលនាំឲ្យមានការព្រួយបារម្ភ។
លោក Nur Jazlan ថ្លែងថា អាជ្ញាធរមានការសង្ស័យថា ក្រុមឧក្រិដ្ឋជនបានរៀបចំ ដឹកជញ្ជូនពួកISក្រោមរូបភាពជាជនភៀសខ្លួនឆ្លង់កាត់ព្រំដែនថៃ ចូលម៉ាឡេស៊ីតាមរថយន្តដឹកទំនិញ លោកថា នេះជាមូលហេតុដែលត្រូវបង្ក្រាប៕