ប្រទេសចិនបានលើកឡើងកាលពីថ្ងៃម្សិលមិញថា អាមេរិកមិនគួរភ្ជាប់បញ្ហាពាណិជ្ជកម្មទៅនឹងកិច្ចពិភាក្សាអំពីកម្មវិធីនុយក្លេអ៊ែររបស់កូរ៉េខាងជើងនោះទេ បន្ទាប់ពីប្រធានាធិបតី ដូណាល់ ត្រាំ បានចោទក្រុងប៉េកាំងថា ពុំបានចាត់វិធានការអ្វីទៅលើក្រុងព្យុងយ៉ាងនោះឡើយ បើទោះបីជាទទួលបានប្រយោជន៍ពីជំនួញជាមួយអាមេរិកក៏ដោយ។ នេះដោយយោងតាមការចុះផ្សាយរបស់សារព័ត៌មាន Channel News Asia។
សារព័ត៌មាននេះបានដកស្រង់សម្ដីអនុរដ្ឋមន្ត្រីពាណិជ្ជកម្មចិន លោក Qian Keming ដែលបានថ្លែងក្នុងសន្និសីទសារព័ត៌មានដ៏ខ្លីមួយថា ចិនជឿថា បញ្ហានុយក្លេអ៊ែររបស់កូរ៉េខាងជើង និងពាណិជ្ជកម្មចិន-អាមេរិក គឺជាបញ្ហាពីរ ដែលមានលក្ខណៈខុសគ្នាទាំងស្រុង។ លោកបន្ថែមថា បញ្ហាកូរ៉េខាងជើង មិនពាក់ព័ន្ធនឹងបញ្ហាពាណិជ្ជកម្មនោះទេ ហើយមិនគួរលើកយកមកជជែកព្រមគ្នានោះទេ។
អនុរដ្ឋមន្ត្រីពាណិជ្ជកម្មចិនរូបនេះ បានលើកឡើងដូច្នេះ ជាការឆ្លើយតបទៅនឹងការចោទសួរទាក់ទងនឹងការព្រមានរបស់លោក ត្រាំ កាលពីថ្ងៃសៅរ៍សប្ដាហ៍មុនថា លោកនឹងមិនអនុញ្ញាតឲ្យចិនមិនធ្វើអ្វីសោះលើបញ្ហាកូរ៉េខាងជើងទៀតនោះទេ បន្ទាប់ពីរដ្ឋឯកោមួយនេះ បានបាញ់សាល្បងគ្រាប់មីស៊ីលឆ្លងទ្វីបជាថ្មីម្ដងទៀត៕
