ប៉ូលិសឥណ្ឌូនេស៊ី បាននិយាយកាលពីថ្ងៃម្សិលមិញថា ជនជាតិចិនជាង ១៥០នាក់ ត្រូវបានសមត្ថកិច្ចប្រទេសនេះចាប់ខ្លួន និងចោទប្រកាន់ថា បានរៀបចំផែនការចាប់ជំរិតតាមប្រព័ន្ធអ៊ីថឹណិតនូវទឹកប្រាក់ប្រហែល ៤៥០លានដុល្លារ តាមរយៈការបោកបញ្ឆោតជនជាតិចិនដូចគ្នា ឲ្យបង់ប្រាក់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកនាំពាក្យប៉ូលិសក្រុងហ្សាកាតា លោក អាហ្កូ យូវ៉ូណូ បានថ្លែងក្នុងសន្និសីទសារព័ត៌មានថា នោះគឺជាបណ្ដាញបោកប្រាស់អន្តរជាតិតាមបណ្ដាញអនឡាញ។ លោកថា ប៉ូលិសឥណ្ឌូនេស៊ីទទួលបានព័ត៌មានដំបូងពីប៉ូលិសចិន មុននឹងចាប់ផ្ដើមការស៊ើបអង្កេតរួមគ្នា។
ប៉ូលិសនិយាយថា ជនសង្ស័យជាជនជាតិចិន ១៤៨នាក់ និងជនជាតិឥណ្ឌូនេស៊ី ៥នាក់ ត្រូវបានចាប់ខ្លួនអំឡុងពេលប្រតិបត្តិការចុះបង្ក្រាបកាលពីចុងសប្ដាហ៍កន្លងមកនេះ នៅទីក្រុងហ្សាកាតា ទីក្រុងស៊ូរ៉ាបាយ៉ា និងនៅលើកោះបាតាំ និងកោះបាលី។
លោក យូវ៉ូណូ បន្ថែមថា ជនល្មើសគឺជាជនជាតិចិន ហើយជនរងគ្រោះក៏ជាជនជាតិចិនផងដែរ ប៉ុន្តែ បទល្មើសប្រព្រឹត្តនៅក្នុងទឹកដីឥណ្ឌូនេស៊ី៕
