ក្រុមភេរវកម្មរដ្ឋឥស្លាម បានប្រកាសទទួលខុសត្រូវចំពោះការវាយប្រហារទៅលើស្ថានទូតអ៊ីរ៉ាក់នៅក្នុងទីក្រុងកាប៊ុល កាលពីថ្ងៃម្សិលមិញនេះ ដែលជនវាយប្រហារអត្តឃាត បានបំផ្ទុះខ្លួនឯងនៅច្រកទ្វារស្ថានទូត ដែលអាចឲ្យខ្មាន់កាំភ្លើងចូលទៅក្នុងបរិវេណស្ថានទូត ហើយបើការបាញ់ប្រហារជាមួយកម្លាំងសន្តិសុខ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើទោះបីជាគ្មានការបញ្ជាក់អំពីការទាក់ទងគ្នាដោយផ្ទាល់ជាមួយក្រុមភេរវកម្មរដ្ឋឥស្លាមនៅប្រទេសអ៊ីរ៉ាក់ និងនៅស៊ីរីក៏ដោយ ក៏ការវាយប្រហារនោះ បានកើតឡើងតែ ៣សប្ដាហ៍ប៉ុណ្ណោះ បន្ទាប់ពីការដណ្ដើមយកទីក្រុងឡើងវិញពីសំណាក់កងទ័ពរដ្ឋាភិបាលអ៊ីរ៉ាក់ ដោយមានក្ដីបារម្ភថា ពួកបះបោរអាចភៀសខ្លួនគេចចេញពីការប្រយុទ្ធគ្នានៅស៊ីរី និងអ៊ីរ៉ាក់។
កងកម្លាំងសន្តិសុខអាហ្វហ្កានីស្ថាន បានពើបប្រយុទ្ធនឹងខ្មាន់កាំភ្លើង ៣នាក់រយៈពេលប៉ុន្មានម៉ោងមុនក្រសួងមហាផ្ទៃប្រកាសថា ការវាយប្រហារនោះ ដែលកើតឡើងនៅសង្កាត់ពាណិជ្ជកម្មដ៏មមាញឹកនោះ ត្រូវបានបង្ក្រាបបានវិញហើយ៕