អតីតនាយករដ្ឋមន្ត្រីថៃ អ្នកស្រី យីងឡាក់ ស៊ីណាវ៉ាត់ បានថ្លែងទាំងទឹកភ្នែកនៅក្នុងតុលាការក្នុងទីក្រុងបាងកក អំឡុងពេលធ្វើសេចក្ដីសន្និដ្ឋានចុងក្រោយនៅថ្ងៃនេះ ដោយអ្នកស្រីថា អ្នកស្រីមិនបានធ្វើទង្វើមិនស្មោះត្រង់នៅក្នុងផែនការស្រូវអង្ករតម្លៃរាប់ពាន់លានដុល្លារនោះឡើយ ហើយអ្នកស្រីថា អ្នកស្រីកំពុងស្ថិតក្រោមការកាត់ក្ដីក្រោមឥទ្ធិពលនយោបាយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកស្រី យីងឡាក់ កំពុងស្ថិតក្រោមការចោទប្រកាន់ថា ធ្វើឲ្យរដ្ឋខាតបង់ប្រាក់ដល់ទៅ ៨ពាន់លានដុល្លារ នៅក្នុងកម្មវិធីស្រូវអង្ករ ក្រោមរដ្ឋបាលរបស់អ្នកស្រី ប៉ុន្តែ Reuters បានដកស្រង់សម្ដីអ្នកស្រី យីងឡាក់ ដែលបានជំទាស់ថា ផែនការស្រូវអង្ករនោះ បានផ្ដល់ផលប្រយោជន៍ដល់ប្រជាជនថៃ។
គោលនយោបាយស្រូវអង្ករនោះ បានជួយឲ្យអ្នកស្រី យីងឡាក់ ឈ្នះការបោះឆ្នោតជាតិកាលពីឆ្នាំ២០១១។ ជាងនេះទៅទៀត ផែនការស្រូវអង្ករនោះ បានស្រូបយកកម្លាំងពលកម្មជិត ៤០ភាគរយ នៃកម្លាំងពលកម្មថៃទាំងមូល។
Reuters បានដកស្រង់សម្ដីអ្នកស្រី យីងឡាក់ ដែលបានថ្លែងប្រាប់តុលាការថា គោលនយោបាយស្រូវអង្ករ បានបង្ហាញនូវផលប្រយោជន៍ដល់សេដ្ឋកិច្ចនៅកម្រិតមូលដ្ឋាន និងនៅទូទាំងប្រទេស។ អ្នកស្រីបន្ថែមថា គោលនយោបាយស្រូវអង្ករនោះ មិនបានធ្វើឲ្យរដ្ឋខាតបង់ប្រាក់នោះឡើយ។
អ្នកស្រី យីងឡាក់ ត្រូវបានទម្លាក់ពីអំណាចនៅក្នុងរដ្ឋប្រហារយោធាមិនបង្ហូរឈាមមួយកាលពីខែឧសភា ឆ្នាំ២០១៤ ហើយរបបសឹកបានហាមឃាត់អ្នកស្រីមិនឲ្យពាក់ព័ន្ធនឹងនយោបាយរយៈពេល ៥ឆ្នាំ ចាប់តាំងពីឆ្នាំ២០១៥មក ប៉ុន្តែ Reuters ថា អ្នកស្រីនៅតែជាបុគ្គលមានប្រជាប្រិយភាពនៅក្នុងចលនារបស់លោក ថាក់ស៊ីន ដែលបានឈ្នះការបោះឆ្នោតនៅឆ្នាំ២០០១៕
