តុលាការរបស់ថៃ បានសម្រេចច្រានចោលបណ្តឹងប្រឆាំងអតីតនាយករដ្ឋមន្ត្រីលោក Somchai Wongsawat បងថ្លៃរបស់លោក ថាក់ ស៊ីន ដែលនេះត្រូវបានគេចាត់ទុកថា ជាករណីកម្រដែលអ្នកគាំទ្រលោក ថាក់ ស៊ីន ឈ្នះក្តីពួកក្រុមរបបយោធា។
លោក Somchai ត្រូវបានគេប្តឹងថា បានរំលោភអំណាច ក្នុងការប្រើឥទ្ធិពលបង្ក្រាបបណ្តាលឲ្យមានអ្នកស្លាប់ និង អ្នករងរបួសកាលពីឆ្នាំ២០០៨។ ក្នុងហេតុការណ៍តវ៉ាកាលពីឆ្នាំ២០០៨ នៅមុខសភាក្រុងបាងកកដែលរៀបចំដោយពួកអាវលឿង មានអ្នកស្លាប់ពីរនាក់ និង រងរបួសរាប់រយនាក់។ នេះបើតាមទីភ្នាក់ងារព័ត៌មានរ៉យទ័រ។
ក្នុងអំឡុងពេលតវ៉ានោះ គេបានចោទ លោក Somchai ថា អ្នកអាយ៉ងឬក្រុមដែលស្តាប់តាមការបញ្ជាពីរលោក ថាក់ ស៊ីន ជានាយករដ្ឋមន្ត្រីដែលបណ្តេញចេញពីតំណែងកាលពីឆ្នាំ២០០៦។
លោក ថាក់ ស៊ីន បច្ចុប្បន្នកំពុងរស់នៅបរទេស ដើម្បីគេចចេញពីការជាប់ពន្ធនាគារ ពាក់ព័ន្ធនឹងការចោទថា បានប្រព្រឹត្តអំពើពុករលួយនៅក្នុងតំណែងនាយករដ្ឋមន្ត្រី។
ក្រកូលស៊ីណាវ៉ាត់ត្រា បានក្លាយចំណុចបញ្ហាជម្លោះនយោបាយនៅក្នុងប្រទេសថៃ នៅប៉ុន្មានទសវត្សរ៍ចុងក្រោយនេះ ដែលមានការចោទថា ប្រជាប្រិយភាពនៃត្រកូលសេដ្ឋីនេះ គំរាមកំហែងដល់របបស្តេច។
ក្រោយការធ្វើរដ្ឋប្រហារទម្លាក់លោកស្រី យីងឡាក់ ប្អូនស្រីរបស់លោក ថាក់ ស៊ីន ចេញពីតំណែងកាលពីឆ្នាំ២០១៤នោះ គឺពួកយោធាបានគ្រប់គ្រងអំណាចយ៉ាងតឹងរឹង ហើយមានការឹតត្បិតខ្លាំងលើក្រុមអ្នកប្រឆាំងពិសេសក្រុមត្រកូល ស៊ីណាវ៉ាត់ត្រា។ ចំណែកករណីតុលាការក្រុងបាងកក សម្រេចឲ្យពួកប្រឆាំងឈ្នះក្តីពួកយោធានេះ នាំឲ្យមាការភ្ញាក់ផ្អើលខ្លាំងពីសំណាក់ក្រុមអ្នកឃ្លាំមើល៕
