អង្គការសហប្រជាជាតិបានបង្ហាញរបាយការណ៍ថា ប្រទេសហ្វីលីពីនជាប្រទេសដែលមានការឆ្លងរាលដាលមេរោគអេដស៍ខ្លាំងជាងគេ នៅតំបន់អាស៊ីប៉ាស៊ីហ្វិក ហើយអំពាវនាវឲ្យបង្កើនអ្នកស្ម័គ្រចិត្តផ្សព្វផ្សាយឲ្យបានទូលាយពីការបង្ការមេរោគអេដស៍។
របាយការណ៍របស់អង្គការសហប្រជាជាតិបង្ហាញនៅថ្ងៃពុធនេះ ឲ្យដឹងថា នៅឆ្នាំ២០១៦ ហ្វីលីពីនមានអ្នកឆ្លងមេរោគអេដស៍ចំនួន១០ ៥០០នាក់ គឺកើនឡើង១៤០% បើប្រៀបធៀបទៅនឹងឆ្នាំ២០១០ គឺរយៈពេល៦ឆ្នាំមុននេះ។ នេះបើតាមសារព័ត៌មាន ABC។
អ្នកជំនាញសុខភាពនៅអង្គការសហប្រជាតិ បានជំរុញឲ្យបង្កើនចំនួនអ្នកស្ម័គចិត្តក្នុងការធ្វើតេសឈាម និង អប់រំពីការប្រើប្រាស់ស្រោមអនាម័យឲ្យបានត្រឹមត្រូវ។
តាមការសិក្សាបង្ហាញថា ក្នុងចំណោមអ្នកឆ្លងពីរទៅបីនាក់ ក្នុងចំណោមអ្នកមានអាយុចន្លោះពី១៥ទៅ ២៤ឆ្នាំ ជាបុរសនិយាយថា ពួកគេមិនបានយល់ដឹងត្រឹមត្រូវរោគសញ្ញានិងវិធីសាស្ត្រព្យាបាលមេរោគអេដស៍នោះទេ៕
