សហរដ្ឋអាមេរិកបានពិពណ៌នាពីការចាប់ខ្លួនមេដឹកនាំគណបក្សប្រឆាំងពីររូបដាក់ពន្ធនាគារជាថ្មីទៀតគឺ ដល់ដំណាក់កាលប្រកាសអាសន្ន ហើយថាអាមេរិកកំពុងពិនិត្យលើវិធានការដើម្បីឆ្លើយតបទៅនឹងមេដឹកនាំគណបក្សកាន់អំណាចនៃប្រទេសនេះ។
មេដឹកនាំគណបក្សប្រឆាំងពីររូបគឺលោក Leopoldo Lopez និងលោក Antonio Ledezma ជាអ្នកដែលត្រូវបានឃុំឃាំងក្នុងផ្ទះនោះ ត្រូវបានចាប់ខ្លួនកាលពីយប់ថ្ងៃអង្គារម្សិលមិញបញ្ជូនទៅកាន់ពន្ធនាគារយោធា។ នេះបើតាមសារព័ត៌មាន BBC។
រដ្ឋមន្ត្រីការបរទេសអាមេរិកលោក រិច ធាឡឺសិន ថ្លែងថា អាមេរិកកំពុងតែពិនិត្យលើជម្រើស រួមបញ្ជូលទាំងការដាក់សម្ពាធ លើប្រធានាធិបតី Nicolas Maduro ឲ្យចុះចេញពីតំណែង។ ប្រតិកម្មរបស់រដ្ឋមន្ត្រីការបរទេសអាមេរិកធ្វើឡើងក្រោយពេលដែលមានការបោះឆ្នោតហិង្សាពីរថ្ងៃ។
ហិង្សាក្នុងដំណើរការបោះឆ្នោតកាលពីថ្ងៃអាទិត្យបានបណ្តាលឲ្យមានមនុស្ស១០នាក់ស្លាប់ ចំណែកបក្សប្រឆាំងប្រកាសមិនចូលរួមនោះទេ។
ចំណែកប្រធានាធិបតី Maduro ថ្លែងថា ការបោះឆ្នោតនោះគឺជាការបោះឆ្នោតបដិវត្តន៍ថ្មីមួយដើម្បីផ្តល់អំណាចឆ្ពោះទៅរកសន្តិភាព ជំរុញឲ្យគ្រប់ភាគីអាចចរចា ដើម្បីធ្វើការរួមគ្នាជួយប្រទេសវេណេហ្សូអេឡាទាំងមូល។
ប៉ុន្តែមេដឹកនាំបក្សប្រឆាំងលើកឡើងថា ប្រធានាធិបតីកំពុងតែព្យាយាមសរសេររដ្ឋធម្មនុញ្ញឡើងវិញ ដើម្បីបង្កើនអំណាចរូបលោកបានច្រើនបំផុត និងគ្រប់គ្រងលើបក្សប្រឆាំង៕