រដ្ឋមន្ត្រីការបរទេសរបស់អាមេរិកថ្លែងថា អាមេរិកមិនចង់ធ្វើសកម្មភាពផ្លាស់ប្តូររបបគ្រប់គ្រងនៅកូរ៉េខាងជើងនោះទេគ្រាន់តែចង់ចរចាចំណុចខ្លះ ដែលការលើកឡើងបែបនេះស្របពេលដែលប្រទេសទាំងពីរកំពុងតែប្រឈមមុខដាក់គ្នាខ្លាំងលើកម្មវិធីអាវុធ។
លោក រិច ធារ៉ឺសិន ថ្លែងថា អាមេរិកចង់ចរចាលើចំណុចខ្លះជាមួយកូរ៉េខាងជើងក្នុងការដោះស្រាយបញ្ហាដែលកំពុងប្រឈមមុខដាក់គ្នា។ ការបង្ហាញជំហរចង់ចរចានេះ ស្របពេលដែលកូរ៉េខាងជើងបញ្ជាក់ថា អាវុធមីស៊ីលរបស់ខ្លួនបាញ់ចុងក្រោយនេះ អាមានលទ្ធភាពទៅភាគខាងលិចនៃសមុទ្រអាមេរិក និង តំបន់ផ្សេងៗទៀត។
លោកធារ៉ឺសិនថ្លែងថា អាមេរិកមិនចង់ផ្លាស់ប្តូររបបដឹកនាំ មិនចង់ផ្តួលរំលំ មិនបង្ខំឲ្យរួបរួមកូរ៉េទាំង២ និងមិនបានរៀបចំបញ្ជូនយោធាអាមេរិកទៅតំបន់ព្រំដែនប្រទេសកូរ៉េទាំងពីរនោះទេ។ នេះបើតាមការចុះផ្សាយរបស់ BBC។
បើទោះជាអាមេរិកបង្ហាញជំហរចង់ចរចាក៏ដោយប៉ុន្តែ មន្ត្រីជាន់ខ្ពស់អាមេរិកលើកឡើងថា លោក ត្រាំកំពុងស្វែងរកដំណោះស្រាយក្នុងការឆ្លើយតបដោយការប្រើសង្គ្រាមដោះស្រាយជាមួយកូរ៉េខាងជើងក្នុងករណីចាំបាច់ណាមួយ៕
