សភាប្រេស៊ីលសម្រេចមិនបញ្ជូនប្រធានាធិបតីទៅតុលាការករណីពុករលួយ

តំណាងរាស្ត្រគណបក្សប្រឆាំងរបស់ប្រេស៊ីល​បានបរាជ័យក្នុងការរកសំឡេងគាំទ្រឲ្យបាន​២ភាគ៣ សម្រាប់បោះឆ្នោតសម្រេចបញ្ជូនករណីចោទថា ប្រធានាធិបតីពាក់ព័ន្ធអំពើពុករលួយ ដើម្បីឲ្យតុលាការស៊ើបអង្កេត និង​គាត់ក្តី។​

ប្រធានាធិបតីប្រេស៊ីលលោក​ Michel Temer បានថ្លែងស្វាគមន៍លទ្ធផលនៃការសម្រេចរបស់សភាក្នុងសំឡេងភាគច្រើន​ដែលលោក​បញ្ជាក់ថា នេះបានបង្ហាញភាពច្បាស់លាស់ និង មិនអាចប្រកែកបាន។​

ប្រធានាធិបតីរូបនេះ រងការចោទថា បានទទួលលុយសំណូកចំនួន​១២លានដុល្លារ ពីក្រុមហ៊ុនផលិតសាច់ទ្រង់ទ្រាយធំមួយឈ្មោះ​JBS ប៉ុន្តែលោកច្រានចោលការចោទប្រកាន់នេះ។​

នៅក្នុងសំណើសុំបញ្ជូនករណីប្រធានាធិបតីទៅតុលាការនេះ ក្នុងចំណោមសមាជិកសភា៥១៣ គឺ២៦៣ បានបោះឆ្នោតជំទាស់ ២២៧ គាំទ្រ លទ្ធផលនេះបង្ហាញពីភាពបរាជ័យនៃសំណើរបស់ក្រុមប្រឆាំង គឺដើម្បីអាចនាំករណីចោទប្រធានាធិបតីទៅតុលាការបាន ត្រូវការសំឡេងគាំទ្រ ២ភាគ៣ ស្មើនឹង ៣៤២សំឡេង។​

លោក​ Michel Temer ថ្លែងថា ការសម្រេចរបស់សភានៅពេលនេះគឺលទ្ធផលដែលទុកពេលឲ្យលោកធ្វើកំណែទម្រង់ដឹកនាំប្រទេសរហូតដល់ចុងឆ្នាំ២០១៨។ លោកថា ដល់ពេលដែលត្រូវវិនិយោគប្រទេសឲ្យរីកចម្រើនហើយ៕