អតីតប្រធានក្រុមហ៊ុនប្រេងជាក្រុមហ៊ុនរដ្ឋរបស់វៀតណាមដែលអាល្លឺម៉ង់ចោទថា ត្រូវបានចាប់ពង្រត់បន្ទាប់ពីដាក់លិខិតសុំសិទ្ធិជ្រកកោន បានបង្ហាញមុខនៅកញ្ចក់ទូរទស្សន៍ហើយថា លោកមិនមានអ្នកណាចាប់ពង្រត់នោះទេ។
លោក Trinh Xuan Thanh ថ្លែងថា លោកបានវិលត្រឡប់ទៅប្រទេសវៀតណាមវិញដោយខ្លួនឯង ដើម្បីបង្ហាញមុខចំពោះសមត្ថកិច្ចក្នុងការដោះស្រាយបញ្ហាដែលកំពុងប្រឈម។
រដ្ឋមន្ត្រីការបរទេសរបស់អាល្លឺម៉ង់ថ្លែងថា អតីតប្រធានក្រុមហ៊ុនប្រេងនោះពិតជាត្រូវបានចាប់ពង្រត់ចេញពីអាល្លឺម៉ង់ទៅកាន់ប្រទេសវៀតណាមវិញប្រាកដមែនដែលថា សកម្មភាពនោះផ្ទុយពីច្បាប់អាល្លឺម៉ង់ និង ច្បាប់អន្តរជាតិ។
លោក Trinh Xuan Thanh ប្រធានក្រុមហ៊ុនប្រេងរបស់រដ្ឋ PetroVietnam ហើយត្រូវបានចោទថា ធ្វើឲ្យបាត់បង់លុយជាតិចំនួន១៥០លានដុល្លារ។ ក្រោយមកលោករត់គេចទៅអាល្លឺម៉ង់ដើម្បីសុំសិទ្ធិជ្រកកោន។ អាល្លឺម៉ង់ចោទថា មន្ត្រីទូត និង ចារកម្មរបស់វៀតណាមបានចាប់បញ្ជូនបុរសរូបនោះទៅកាន់ប្រទេសវៀតណាមវិញ។
មេធាវីការពារលោក Trinh Xuan Thanh នៅប្រទេសអាល្លឺម៉ង់លោកស្រី Petra Schlagenhauf ថ្លែងថា កូនក្តីរបស់លោកស្រីត្រូវបានអាជ្ញាធរវៀតណាមបង្ខំឲ្យនិយាយ ដើម្បីលុបបំបាត់ការសង្ស័យជាសាធារណៈ។ លោកស្រីថា ពេលនេះមានការបារម្ភខ្លាំងពីសុខភាពកូនរបស់លោកស្រី៕