សេចក្ដីរាយការណ៍បានឲ្យដឹងថា ជនសង្ស័យជាជនបះបោរ បានសម្លាប់ពុទ្ធសាសនិកយ៉ាងតិច ៦នាក់ នៅភាគខាងលិចប្រទេសភូមា កាលពីថ្ងៃព្រហស្បតិ៍កន្លងមកនេះ ចំពេលដែលអំពើហឹង្សាកំពុងបន្តកើតមាននៅក្នុងរដ្ឋរ៉ាក់ឃីន។
ទីភ្នាក់ងារព័ត៌មាន Reuters បានដកស្រង់សម្ដីមន្ត្រីរដ្ឋាភិបាលភូមា ដែលបាននិយាយថា កម្លាំងសន្តិសុខ បានរកឃើញសាកសពបុរស ៣នាក់ និងស្ត្រី ៣នាក់ ត្រូវបានកាប់សម្លាប់ និងបាញ់សម្លាប់ នៅជួរភ្នំម៉ាយូ នៅជិតទីក្រុងមួងដាវ។
ការិយាល័យមេដឹកនាំភូមាអ្នកស្រី អ៊ុងសាន ស៊ូជី បានលើកឡើងក្នុងសេចក្ដីប្រកាសព័ត៌មានមួយថា ពួកបះបោរគឺជាអ្នកទទួលខុសត្រូវលើការសម្លាប់សមាជិកជនជាតិភាគតិចម៉្រូ ៦នាក់នោះ។
រដ្ឋរ៉ាក់ឃីន ដែលសម្បូរទៅដោយជនជាតិមូស្លីមរ៉ូហ៊ីងយ៉ា បានធ្លាក់ទៅក្នុងអំពើហឹង្សាចាប់តាំងពីខែតុលាឆ្នាំមុន នៅពេលពួករ៉ូហ៊ីងយ៉ាងបានសម្លាប់ប៉ូលិសភូមា ៩នាក់៕