ក្រុមប្រឹក្សាសន្តិសុខអង្គការសហប្រជាជាតិ គ្រោងនឹងបោះឆ្នោតលើសេចក្ដីសម្រេចថ្មីមួយដែលស្នើឡើងដោយអាមេរិក ក្នុងបំណងកាត់ផ្ដាច់ចំណូល ៣ពាន់លានដុល្លារ បានមកពីការនាំចេញប្រចាំឆ្នាំរបស់កូរ៉េខាងជើង បន្ទាប់ពីរដ្ឋឯកោមួយនេះបានធ្វើតេស្តបាញ់សាកល្បងគ្រាប់មីស៊ីលឆ្លងទ្វីបជាថ្មីម្ដងទៀតកាលពីខែកក្កដាកន្លងមកថ្មីៗនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
អ្នកកាទូតម្នាក់ប្រចាំនៅស្ថាប័នកំពូលនេះ បាននិយាយដោយមិនបញ្ចេញឈ្មោះថា គេមានទំនុកចិត្តថា សម្ព័ន្ធមិត្តកូរ៉េខាងជើង មានចិន និងរុស្ស៊ី នឹងគាំទ្រសេចក្ដីសម្រេចនេះ ដែលត្រូវបានបញ្ជូនទៅដល់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃម្សិលមិញនេះ។
ក្រុមប្រឹក្សានេះ នឹងត្រូវបោះឆ្នោតស្វែងរកការគាំទ្រនៅរសៀលថ្ងៃនេះ ពីសំណាក់អាមេរិក ចិន រុស្ស៊ី បារាំង និងអង់គ្លេស។
សេចក្ដីសម្រេចនេះ នឹងហាមឃាត់មិនឲ្យកូរ៉េខាងជើងនាំចេញធ្យូងថ្ម ដែក គ្រឿងសមុទ្រ និងធនធានដទៃទៀត។ វាក៏ហាមឃាត់ប្រទេសដទៃទៀតមិនឲ្យបង្កើនចំនួនពលករកូរ៉េខាងជើងបម្រើការងារនៅឯក្រៅប្រទេសផងដែរ៕