ក្រុមរដ្ឋមន្ត្រីការបរទេសអាស៊ាន កាលពីថ្ងៃម្សិលមិញនេះ បានបង្ហាញក្ដីកង្វល់យ៉ាងខ្លាំង ទៅនឹងភាពតានតឹងកាន់តែខ្លាំងនៅឧបទ្វីបកូរ៉េ ដែលកើតចេញពីការបាញ់សាកល្បងគ្រាប់មីស៊ីលរបស់កូរ៉េខាងជើងនាពេលថ្មីៗនេះ។ នេះដោយយោងតាមការចុះផ្សាយរបស់សារព័ត៌មានសិង្ហបុរី Channel News Asia។
សារព័ត៌មាននេះ បានចុះផ្សាយបន្តថា ក្រុមរដ្ឋមន្ត្រីការបរទេសអាស៊ានបានចេញសេចក្ដីថ្លែងការណ៍មួយអំឡុងពេលពួកគេជួបប្រជុំគ្នានៅទីក្រុងម៉ានីល។ សេចក្ដីថ្លែងការណ៍នោះ បានលើកឡើងថា ដំណើរវិវត្តទាំងនេះ បានគំរាមកំហែងយ៉ាងធ្ងន់ធ្ងរទៅដល់សន្តិភាព សន្តិសុខ និងស្ថេរភាពក្នុងតំបន់ និងពិភពលោក។
ក្រុមប្រមុខការទូតអាស៊ាន បានជំរុញទៅកូរ៉េខាងជើងឲ្យអនុវត្តឲ្យបានពេញលេញជាបន្ទាន់ ទៅតាមកាតព្វកិច្ចរបស់ខ្លួន នៅក្រោមសេចក្ដីសម្រេចពាក់ព័ន្ធទាំងអស់របស់ក្រុមប្រឹក្សាសន្តិសុខអង្គការសហប្រជាជាតិ។
ក្រុមរដ្ឋមន្ត្រីការបរទេសអាស៊ានបានថ្លែងការណ៍បែបនេះ ចំពេលដែលក្រុមប្រឹក្សាសន្តិសុខអង្គការសហប្រជាជាតិ បានសម្រេចដាក់ទណ្ឌកម្មថ្មីបន្ថែមទៀតលើកូរ៉េខាងជើង បន្ទាប់ពីរដ្ឋឯកោមួយនេះ បានបាញ់សាកល្បងគ្រាប់មីស៊ីលឆ្លងទ្វីបកាលពីសប្ដាហ៍មុន៕