មន្ត្រីយោធានៅកោះចាំប៊ី ប្រទេសឥណ្ឌូនេស៊ី បាននិយាយកាលពីថ្ងៃម្សិលមិញថា លោកបានបញ្ជាឲ្យបាញ់សម្លាញ់នរណាដែលបានដុតព្រៃ ខណៈដែលអាជ្ញាធរប្រទេសនេះកំពុងព្យាយាមពន្លត់ភ្លើងឆេះព្រៃ ដែលបង្កជាផ្សែងគ្របដណ្ដប់លើតំបន់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើតាម Reuters ខេត្តចំនួន ៥ របស់ឥណ្ឌូនេស៊ី ត្រូវបានប្រកាសអាសន្នអំពីភ្លើងឆេះព្រៃ ដោយព្រៃឈើជាច្រើនកន្លែងត្រូវភ្លើងឆាបឆេះក្នុងរយៈពេលមួយសប្ដាហ៍មកនេះ។
អាជ្ញាធរឥណ្ឌូនេស៊ី រួមទាំងកងទ័ពផងដែរ កំពុងតែព្យាយាមគ្រប់គ្រងស្ថានការណ៍នេះ។
មេបញ្ជាការកងទ័ពនៅខេត្តចាំប៊ី លោក រីហ្វ្រីហ្សាល់ បាននិយាយថា លោកសង្កត់ធ្ងន់នូវចំណុចនេះទៅដល់ប្រជាជនជាច្រើនដងហើយ ហើយចង់បង្ហាញពីជំហរប្រកាន់តឹងចំពោះបញ្ហានេះ៕