មេដឹកនាំគណបក្សខ្មែររួបរួមជាតិ លោក ញឹក ប៊ុនឆៃ ត្រូវបានតុលាការចោទប្រកាន់ជាផ្លូវការនៅរសៀលថ្ងៃនេះ បន្ទាប់ពីត្រូវបានសាកសួរអស់រយៈពេលប៉ុន្មានថ្ងៃមកនោះ។
អតីតមន្ត្រីជាន់ខ្ពស់រដ្ឋាភិបាលរូបនេះ ត្រូវបានសមត្ថកិច្ចឃាត់ខ្លួនកាលពីថ្ងៃព្រហស្បតិ៍កន្លងមកនេះ ដោយសមត្ថកិច្ចថា មានជាប់ពាក់ព័ន្ធនឹងបទល្មើសគ្រឿងញៀនកាលពី ១០ឆ្នាំមុន។
អតីតមន្ត្រីជាន់ខ្ពស់គណបក្សរាជានិយមហ្វ៊ុនស៊ិនប៉ិចរូបនេះ ត្រូវបានសាលាដំបូងរាជធានីភ្នំពេញសាកសួរតាំងពីថ្ងៃម្សិលមិញម៉្លេះ។
ក្នុងសេចក្ដីថ្លែងការណ៍នៅរសៀលថ្ងៃនេះ អ្នកនាំពាក្យអយ្យការអមសាលាដំបូងរាជធានីភ្នំពេញ បានឲ្យដឹងថា លោក ញឹក ប៊ុនឆៃ ត្រូវបានតុលាការចោទប្រកាន់ពីបទសមគំនិតក្នុងបទល្មើសផលិតគ្រឿងញឿន និងនាំចូលសារធាតុសម្រាប់ផ្សំគ្រឿងញៀន។
អ្នកនាំពាក្យសាលារាជធានីភ្នំពេញ បានឲ្យដឹងក្នុងសេចក្ដីថ្លែងការណ៍នោះបន្ថែមថា សំណុំរឿងលោក ញឹក ប៊ុនឆៃ ត្រូវបានបញ្ជូនទៅចៅក្រមស៊ើបសួរ ដើម្បីចាត់ការបន្តទៅតាមនីតិវិធីច្បាប់។
បើតាមសេចក្ដីថ្លែងការណ៍នោះ ការចោទប្រកាន់លោក ញឹក ប៊ុនឆៃ អាយុ ៥៩ឆ្នាំ ត្រូវបានធ្វើឡើងបន្ទាប់ពីទណ្ឌិតជនជាតិចិនឈ្មោះ ជា ជុង បានសារភាព និងរៀបរាប់ឈ្មោះអ្នកនៅក្រោយនៃការផលិតគ្រឿងញៀន កាលពីឆ្នាំ២០០៧ នៅឯភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
ទោះជាយ៉ាងណាក៏ដោយ ការចាប់ខ្លួន និងចោទប្រកាន់លោក ញឹក ប៊ុនឆៃ ត្រូវបានធ្វើឡើងបន្ទាប់ពីលេចធ្លាយដំណឹងថា ឧត្ដមសេនីយ៍ផ្កាយ ៤រូបនេះ មានបំណងចុះចូលជាមួយគណបក្សសង្គ្រោះជាតិ ដែលនាំឲ្យមានការចោទថា លោកមិនស្មោះត្រង់នឹងគណបក្សកាន់អំណាច៕