ដូចការរំពឹងទុកមែន ក្រុមប្រឹក្សាសន្តិសុខអង្គការសហប្រជាជាតិ កាលពីយប់មិញនេះ បានសម្រេចជាឯកឆ័ន្ទលើទណ្ឌកម្មថ្មីដាក់ទៅលើកូរ៉េខាងជើង ដែលនឹងប៉ះពាល់ទៅដល់ចំណូលប្រចាំឆ្នាំ ៣ពាន់លានដុល្លារ បានមកពីការនាំចេញរបស់រដ្ឋឯកោមួយនេះ បន្ទាប់ពីរបបក្រុងព្យុងយ៉ាងបានធ្វើតេស្តសាកល្បងគ្រាប់មីស៊ីលឆ្លងទ្វីបជាថ្មីម្ដងទៀត។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
សេចក្ដីសម្រេចដែលស្នើឡើងដោយអាមេរិក បានហាមឃាត់ការនាំចេញរ៉ែធ្យូងថ្ម ដែក សំណ និងអាហារសមុទ្រ។ សេចក្ដីសម្រេចនេះក៏បានហាមឃាត់បណ្ដាប្រទេសនានា មិនឲ្យបង្កើនចំនួនពលករកូរ៉េខាងជើងដែលធ្វើការនៅក្រៅប្រទេសផងដែរ ពោលគឺបានហាមឃាត់នូវការវិនិយោគរួមគ្នាជាមួយនឹងកូរ៉េខាងជើង។
អគ្គរដ្ឋទូតអាមេរិកប្រចាំអង្គការសហប្រជាជាតិ អ្នកស្រី Nikki Haley បានប្រាប់ក្រុមប្រឹក្សាសន្តិសុខថា វិធានការដទៃទៀត ត្រូវតែប្រកាន់យក។ អ្នកស្រីថា អាមេរិកកំពុង និងបន្តចាត់វិធានការបង្ការសំខាន់ៗ ដើម្បីការពារខ្លួន និងសម្ព័ន្ធមិត្ត។
កូរ៉េខាងជើងបានចោទអាមេរិក និងកូរ៉េខាងត្បូងថា បានបង្កើនភាពតានតឹង តាមរយៈការធ្វើសមយុទ្ធយោធា៕
