មន្ត្រីការទូតជាន់ខ្ពស់របស់កូរ៉េខាងជើងនិងខាងត្បូងបានជួបប្រជុំគ្នាដាច់ដោយឡែក ក្រៅកិច្ចប្រជុំនៅក្រុងម៉ានីលប្រទេសហ្វីលីពីនកាលពីថ្ងៃអាទិត្យម្សិលមិញ ហើយត្រូវបានសារព័ត៌មានកូរ៉េខាងត្បូងយ៉ុងហាប់ដកស្រង់ចុះផ្សាយនៅថ្ងៃចន្ទនេះ។
រដ្ឋមន្ត្រីការបរទេសកូរ៉េខាងត្បូង កាង គីយ៉ុងវ៉ា បានថ្លែងថា លោកបានជួបជាមួយរដ្ឋមន្ត្រីការបរទេសកូរ៉េខាងជើងរីយ៉ុងហូ នៅក្នុងពិធីអាហារពេលល្ងាចក្រៅកិច្ចប្រជុំមួយកាលពីម្សិលមិញ។
ក្នុងពេលនោះ រដ្ឋមន្ត្រីការបរទេសរបស់កូរ៉េខាងត្បូងបានជំរុញឲ្យកូរ៉េខាងជើង ទទួលការស្នើឲ្យមានការជជែកគ្នារវាងយោធាថ្នាក់ក្រោមនៃប្រទេសទាំងពីរដែលកំពុងមានការបែកបាក់នៅឧបទ្វីបកូរ៉េ និង ស្នើឲ្យមានការពិភាក្សាបន្តជុំថ្មីទៀត ឲ្យគ្រួសារដែលបែកបាក់ ដោយសារម្ខាងនៅកូរ៉េខាងជើង និង កូរ៉េខាងត្បូងបានជួបគ្នា។
ប៉ុន្តែខាងកូរ៉េខាងជើងបានឆ្លើយតបដោយមិនទទួលយកដោយចោទថា កូរ៉េខាងត្បូងបានសហការជាមួយអាមេរិក ដាក់សម្ពាធលើកូរ៉េខាងជើង។
ប្រធានាធិបតីកូរ៉េខាងត្បូងដែលទើបជាប់ឆ្នោតថ្មី លោក មូន ជែអ៊ីន បានសន្យាបន្ថយភាពតានតឹង និងធ្វើយ៉ាងណាឲ្យមានការផ្សះផ្សាវាងកូរ៉េទាំងពីរ ប៉ុន្តែការតាំងចិត្តរបស់លោកហាក់មិនបានផលទេ ដោយសារមិនមានការសហការពីកូរ៉េខាងជើង៕
