ប្រធានាធិបតីកេនយ៉ាបានអំពាវនាវឲ្យប្រជាពលរដ្ឋដែលទៅបោះឆ្នោតទាំងអស់ប្រកាន់ភ្ជាប់នូវគំនិតសន្តិភាព ខណៈការបោះឆ្នោតសកលចាប់ផ្តើមនៅព្រឹកថ្ងៃអង្គារនេះ ហើយមានការព្រួយបារម្ភខ្លាំងថា លទ្ធផលនៃសន្លឹកឆ្នោតនឹងនាំឲ្យមានហិង្សាកើតឡើងរវាងក្រុមមាននិន្នាការនយោបាយផ្សេងៗគ្នា។
ប្រធានាធិបតី Uhuru Kenyatta ថ្លែងតាមកញ្ចក់ទូរទស្សន៍នៅល្ងាចថ្ងៃចន្ទម្សិលមិញ ឲ្យអ្នកបោះឆ្នោតបង្ហាញនូវគំនិតសន្តិភាព។ លោកជំរុញឲ្យប្រជាពលរដ្ឋដែលបានទៅចុះឈ្មោះបោះឆ្នោតចំនួន១៩លាននាក់ចេញទៅបោះឆ្នោតឲ្យបានគ្រប់គ្នា ប៉ុន្តែលោករំលឹកថា ត្រូវចូលរួមដោយសន្តិភាពតម្រង់តាមបន្ទប់ការិយាល័យបោះឆ្នោត។
គូរប្រជែងរបស់ប្រធានាធិបតី Kenyatta ច្រើនឆ្នាំមកនេះ គឺលោក Raila Odinga មិនបានអំពាវនាវសារសន្តិភាពដល់ម្ចាស់ឆ្នោតនេះទេ។
លោក Kenyatta អាយុ៥៥ឆ្នាំ កំពុងធ្វើសកម្មភាពឆ្ពោះទៅរកការកាន់អំណាចនៅអាណត្តិទី២របស់លោកបន្តទៀត។ លោកស្នើឲ្យអ្នកបោះឆ្នោតទាំងអស់ក្រោយពេលបោះឆ្នោតត្រូវត្រឡប់ទៅផ្ទះវិញ ហើយរង់ចាំស្តាប់លទ្ធផលដោយមានភាពស្ងៀមស្ងាត់៕