រដ្ឋមន្ត្រីការពារជាតិអាមេរិក លោក Jim Mattis បានព្រមានទៅកូរ៉េខាងជើងកាលពីថ្ងៃម្សិលមិញថា ប្រទេសនេះនឹងកាន់តែផ្គើននឹងជម្លោះនឹងអាមេរិក ដោយបានប្រាប់ក្រុងព្យុងយ៉ាងឲ្យបញ្ឈប់នូវការពិចារណាលើទង្វើណាមួយដែលបង្កហានិភ័យដល់ប្រជាជនរបស់ខ្លួន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
លោក Mattis បានលើកឡើងនៅក្នុងសេចក្ដីថ្លែងការណ៍មួយថា កូរ៉េខាងជើងត្រូវតែរើសយកបញ្ឈប់ការផ្ដាច់ខ្លួនឯងឲ្យឯកោ និងជំហរបន្តផលិតអាវុធនុយក្លេអ៊ែរ។
លោកបន្តថា កូរ៉េខាងជើងគួរតែបញ្ឈប់ការពិចារណានូវសកម្មភាពណាដែលនឹងនាំទៅរកការបញ្ចប់របបនេះ និងបំផ្លាញប្រជាជនរបស់ខ្លួន។
ការលើកឡើងរបស់ប្រមុខមន្ទីរប៉ង់តាកោណរូបនេះ បានកើតឡើងមួយថ្ងៃក្រោយពីប្រធានាធិបតីអាមេរិក លោក ដូណាល់ ត្រាំ បានចេញនូវការព្រមានទៅមេដឹកនាំកូរ៉េខាងជើង លោក គីម ជុងអ៊ុន ដោយបានប្រាប់ថា ក្រុងព្យុងយ៉ាងកំពុងប្រលែងលេងនឹងភ្លើង ដោយសារតែកម្មវិធីមីស៊ីល និងអាវុធនុយក្លេអ៊ែររបស់ខ្លួន។
លោក Mattis បាននិយាយថា ក្រុមប្រឹក្សាសន្តិសុខអង្គការសហប្រជាជាតិ បច្ចុប្បន្ននេះ មានសំឡេងមូលគ្នា ក្រោយពីបានអនុម័តយល់ព្រមជាឯកឆ័ន្ទលើទណ្ឌកម្មថ្មីប្រឆាំងនឹងកូរ៉េខាងជើង៕
