ប្រទេសចិន កាលពីថ្ងៃម្សិលមិញនេះ បានជម្លៀសប្រជាជនជិត ៦ម៉ឺននាក់ នៅតំបន់ភ្នំនៅភាគនិរតីប្រទេស បន្ទាប់ពីរញ្ជួយដីដ៏ខ្លាំងមួយ បានសម្លាប់មនុស្សយ៉ាងតិច ១៩នាក់ ដោយបានវាយប្រហារទៅលើតំបន់មួយធ្លាប់ទទួលរងគ្រោះរញ្ជួយដីម្ដងរួចមកហើយកាលពីឆ្នាំ២០០៨កន្លងមក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
រញ្ជួយដីកម្រិត ៦.៥រ៉ិចទ័រ បានវាយប្រហារខេត្តស៊ីឈួនកាលពីយប់ថ្ងៃអង្គារកន្លងមកនេះ ដោយបានបំផ្លាញផ្លូវហាយវ៉េនៅតំបន់ភ្នំ បង្កឲ្យមានការរអិលបាក់ដី បំផ្លាញអគារ និងបង្កឲ្យអ្នកស្រុកភ័យខ្លាច ហើយរត់ចេញពីអគារនានា។
រដ្ឋបាលខេត្តនេះ បាននិយាយកាលពីថ្ងៃម្សិលមិញថា ទេសចរភាគច្រើន ដែលជាប់នៅឧទ្យានជាតិដ៏ល្បីមួយ ត្រូវបានជម្លៀសចេញ បន្ទាប់ពីសម្រាកលម្ហែនៅលើទីលំហរមួយយប់។
យោងតាមអាជ្ញាធរខេត្តនេះ ពលរដ្ឋនៅខេត្តនោះ ក៏នឹងត្រូវបានជម្លៀសចេញទៅទីតាំងមានសុវត្ថិភាពផងដែរ។
ទីភ្នាក់ងារព័ត៌មានស៊ិនហួ បានរាយការណ៍ថា រញ្ជួយដីនោះ បានសម្លាប់មនុស្សយ៉ាងតិច ១៩នាក់ និងបង្កឲ្យមនុស្សជាង ២ម៉ឺន ៦ពាន់ ៣រយនាក់រងរបួសធ្ងន់ធ្ងរ ក្នុងនោះមានទេសចរបរទេស ២នាក់ផងដែរ៕