កូរ៉េខាងជើង នៅថ្ងៃនេះ បានចំអកឡកឡើយដាក់ប្រធានាធិបតីអាមេរិក លោក ដូណាល់ ត្រាំ ថា “ខ្សត់ហេតុផល” ដែលជំរុញឲ្យមានការថ្លែងវាយប្រហារគ្នាទៅវិញទៅមក នៅក្នុងផែនការបាញ់គ្រាប់មីស៊ីលសំដៅទៅដែនដីកោះហ្គាំរបស់អាមេរិក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
កូរ៉េខាងជើង បានលើកឡើងថា គម្រោងការវាយប្រហារលើដែនដីកោះមួយនេះ ដែលជាមូលដ្ឋានកងទ័ពអាមេរិកនោះ ត្រូវបានចាត់ទុកជា “សញ្ញាព្រមានដ៏សំខាន់មួយ” ដោយមានតែការប្រើកម្លាំងតែមួយមុខគត់ នឹងមានឥទ្ធិពលទៅលើមេដឹកនាំអាមេរិក។
ការប្រកាសបែបនេះរបស់កូរ៉េខាងជើង បានកើតឡើងក្រោយពីលោក ត្រាំ បង្ហោះសារលើ Twitter ថា អាវុធនុយក្លេអ៊ែរអាមេរិក មានថាមពល និងកម្លាំងខ្លាំងក្លាជាងពេលមុនឆ្ងាយណាស់។
លោក ត្រាំ បាននិយាយថា កូរ៉េខាងជើងកំពុងប្រលែងលេងនឹងភ្លើង ដូចដែលពិភពលោកមិនដែលបានឃើញសោះ។
សង្គ្រាមពាក្យសម្ដីជុំវិញកម្មវិធីនុយក្លេអ៊ែរ និងគ្រាប់មីស៊ីលកូរ៉េខាងជើងនេះ កំពុងតែបង្កឲ្យមានក្ដីបារម្ភថា អាចនាំទៅរកមហន្តរាយនៅលើឧបទ្វីបកូរ៉េ និងលើសពីឧបទ្វីបនេះទៅទៀត៕