ជំនន់ទឹកភ្លៀងរដូវមូសុង និងការរអិលបាក់ដី បានសម្លាប់មនុស្សយ៉ាងតិច ៩៤នាក់នៅទូទាំងប្រទេសនេប៉ាល់ និងឥណ្ឌា ប៉ុន្តែ ក្រុមមន្ត្រីព្រួយបារម្ភថា តួលេខអាចកើនឡើងខ្ពស់ ខណៈដែលក្រុមអ្នកជួយសង្គ្រោះកំពុងបន្តស្វែងរកមនុស្សរាប់សិបនាក់ទៀត ដែលបានបាត់ខ្លួននៅក្នុងល្បាប់ភក់ និងភូមិដ្ឋានលិចលង់ក្រោមទឹក។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
អាជ្ញាធរ បានធ្វើបច្ចុប្បន្នភាពតួលេខអ្នកស្លាប់ដោយសារទឹកជំនន់នៅទូទាំងប្រទេសកាលពីថ្ងៃម្សិលមិញនេះ ដោយរកឃើញថា មានចំនួន ៩៤នាក់ហើយ ខណៈដែលទឹកជំនន់បន្តកើនឡើង ដោយបង្ខំមនុស្សរាប់ពាន់នាក់ឲ្យជម្លៀសទៅទីទួលខ្ពស់។
មជ្ឈមណ្ឌលជាតិសង្គ្រោះបន្ទាន់របស់នេប៉ាល់ បានរាយការណ៍ថា មនុស្ស ១៧នាក់ទៀត កំពុងបាត់ខ្លួន ខណៈដែលប្រតិបត្តិការស្វែងរក និងជួយសង្គ្រោះ កំពុងដំណើរការទៅ ប៉ុន្តែ កម្រិតទឹកជំនន់មិនទាន់ថមថយនៅឡើយទេ។
កាកបាទក្រហមបានប៉ាន់ប្រមាណថា តួលេខអ្នកស្លាប់អាចមានចំនួនលើសពី ៥៣នាក់ ខណៈមនុស្សរាប់សិបនាក់ទៀតកំពុងបាត់ខ្លួន និងរងរបួស ហើយផ្ទះសម្បែងរាប់ពាន់កន្លែង ត្រូវបានបំផ្លាញ។
នៅឯប្រទេសឥណ្ឌាឯណោះវិញ ការរអិលបាក់ដីនៅតំបន់ភ្នំនៅភាគខាងជើងប្រទេស បានលេបត្របាក់រថយន្តក្រុងដឹកអ្នកដំណើរពីរគ្រឿង ដោយបានសម្លាប់មនុស្ស ៤៥នាក់៕
