ទីភ្នាក់ងារព័ត៌មាន Reuters ចុះផ្សាយថា ការប្រយុទ្ធគ្នារវាងក្រុមបះបោរគាំទ្រដោយរដ្ឋាភិបាល និងពួកសកម្មប្រយុទ្ធឥស្លាម បានសម្លាប់មនុស្សយ៉ាងតិច ២៥នាក់ នៅភាគខាងត្បូងហ្វីលីពីន។
Reuters បានចុះផ្សាយដូច្នេះដោយដកស្រង់សម្ដីទាហានហ្វីលីពីននៅថ្ងៃនេះ ហើយការប្រយុទ្ធគ្នានោះ កើតឡើងចំពេលដែលយោធាហ្វីលីពីនកំពុងព្យាយាមស្ដារសណ្ដាប់នៅលើកោះមិនដាណាវឡើងវិញ។ កោះមួយនេះ កំពុងស្ថិតក្នុងស្ថានភាពអសន្តិសុខចាប់តាំងពីចុងខែឧសភាមកម៉្លេះ។
អ្នកនាំពាក្យយោធា លោក ហ្គឺរី បេសាណា ត្រូវបានដកស្រង់សម្ដីថា ទាហានបានបាញ់កាំភ្លើងធំគាំទ្រដល់រណសិរ្សរំដោះឥស្លាមម៉ូរូ។ រណសិរ្សមួយនេះ គឺជាក្រុមបះបោរដែលបានចុះកិច្ចព្រមព្រៀងសន្តិភាពជាមួយរដ្ឋាភិបាល។ អ្នកនាំពាក្យយោធាហ្វីលីពីនថា នេះគឺជាការព្យាយាមកម្ចាត់ពួកជ្រុលនិយម។
កោះមិនដាណាវដែលមានប្រជាជនដល់ទៅ ២២លាននាក់ និងមានទំហំស្មើនឹងប្រទេសកូរ៉េខាងត្បូងនោះ កំពុងស្ថិតនៅក្រោមច្បាប់សឹកយ៉ាងហោចណាស់ក៏រហូតដល់ចុងឆ្នាំនេះដែរ ខណៈដែលហ្វីលីពីនព្យាយាមកម្ចាត់កម្លាំងគំរាមកំហែងពីពួកឥស្លាមជ្រុលនិយម៕
