ប្រមុខចារកម្មអាមេរិក CIA លោក Mike Pompeo បានធានាអះអាងកាលពីថ្ងៃម្សិលមិញថា គ្មានអ្វីនឹងកើតឡើងឡើយនៅក្នុងវិវាទជាប់គាំងរវាងអាមេរិក និងកូរ៉េខាងជើង ប៉ុន្តែលោកលើកឡើងថា លោកនឹងមិនភ្ញាក់ផ្អើលនោះឡើយ ប្រសិនបើក្រុងព្យុងយ៉ាងបន្តបាញ់សាកល្បងគ្រាប់មីស៊ីលជាថ្មីទៀតនោះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
សម្ដីរបស់លោក Pompeo បានកើតឡើងមួយសប្ដាហ៍ក្រោយពីប្រធានាធិបតីអាមេរិក លោក ដូណាល់ ត្រាំ បានប្ដេជ្ញាវាយប្រហារកូរ៉េខាងជើងវិញ ប្រសិនបើក្រុងព្យុងយ៉ាងបន្តគំរាមកំហែងអាមេរិកជាមួយអាវុធនុយក្លេអ៊ែរនោះ ហើយក្រុងព្យុងយ៉ាងបានតបតវិញជាមួយការប្រកាសផែនការបាញ់គ្រាប់មីស៊ីលដាក់កោះហ្គាំរបស់អាមេរិក។
ដោយត្រូវបានចោទសួរអំពីក្ដីបារម្ភនោះ លោក Pompeo បានប្រាប់ទូរទស្សន៍ Fox News កាលពីយប់មិញថា “គ្មានអ្វីនឹងកើតឡើងនោះឡើយ”។
លោកបន្ថែមថា ក្រុមចារកម្មអាមេរិកពិតជាបានដឹងច្បាស់អំពីអ្វីដែលកំពុងកើតមានឡើងនៅកូរ៉េខាងជើង។
លោកលើកឡើងបន្តថា លោកជឿជាក់ថា កូរ៉េខាងជើងនឹងបន្តអភិវឌ្ឍសមត្ថភាពគ្រាប់មីស៊ីលរបស់ខ្លួន ក្រោមមេដឹកនាំលោក គីម ជុងអ៊ុន ហេតុនេះ លោកមិនភ្ញាក់ផ្អើលនោះទេ ប្រសិនបើកូរ៉េខាងជើងធ្វើតេស្តគ្រាប់មីស៊ីលជាថ្មីម្ដងទៀតនោះ៕