វេទិកាមួយដែលដឹកនាំដោយអតីតនាយករដ្ឋមន្ត្រីម៉ាឡេស៊ី លោក មហាធៀ មហាមេធ ដែលប៉ុនប៉ងទម្លាក់រដ្ឋាភិបាលនោះ បានប្រែក្លាយទៅជាហឹង្សាកាលពីថ្ងៃម្សិលមិញនេះ ខណៈដែលអ្នកចូលរួមបានគប់ស្បែកជើង និងកៅអីដាក់គ្នា និងដុតភ្លើងឡើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា ការប្រមូលផ្ដុំនោះ មានបំណងលើកឡើងពីរឿងអាស្រូវហិរញ្ញវត្ថុដ៏ធំ ដែលបានលងបន្លាចនាយករដ្ឋមន្ត្រីម៉ាឡេស៊ី លោក ណាជីប រ៉ាហ្សាក់ និងដែលបានជំរុញលោក មហាធៀ អាយុ ៩២ឆ្នាំ ឲ្យហក់ចូលមកប្រលូកក្នុងនយោបាយជាថ្មីម្ដងទៀត។
ដោយបានដកស្រង់សម្ដីអ្នករៀបចំកម្មវិធី AFP បានរាយការណ៍ថា នៅឯការប្រមូលផ្ដុំប្រហែល ៩០នាទី នៅជាយក្រុងគួឡាឡុំពួនោះ ក្រុមអ្នកបង្កបញ្ហាបានចាប់ផ្ដើមចោលស្បែកជើង កៅអី ដបទឹកសុទ្ធដាក់លោក មហាធៀ។
អ្នករៀបចំកម្មវិធី ត្រូវបាន AFP ដកស្រង់សម្ដីចុះផ្សាយថា ពួកបង្កបញ្ហាបានដុតភ្លើងឡើងអំឡុងពេលផ្ទុះអំពើហឹង្សានោះ ហើយវីដេអូបានបង្ហាញផ្សែងហុយពេញបន្ទប់ជួបជុំនោះ។
លោក មហាធៀ ដែលកំពុងតែទទួលសំណួរពីអ្នកស្ដាប់នៅពេលនោះ ត្រូវបានគេនាំចេញពីអគារ និងពុំរងរបួសនោះឡើយ។ តែយ៉ាងណា យ៉ាងហោចមនុស្ស ២ បានរងរបួស៕