អនុរដ្ឋមន្ត្រីការពារជាតិកូរ៉េខាងត្បូង បាននិយាយថា កូរ៉េខាងជើងហាក់មិនទាន់សម្រេចបានបច្ចេកវិទ្យាមីស៊ីលទាំងស្រុងនៅឡើយទេ ហើយត្រូវការពេលវេលាយ៉ាងតិច ១ ឬ ២ឆ្នាំបន្ថែមទៀត ដើម្បីធ្វើកិច្ចការនេះ បើទោះបីជាសមត្ថភាពកសាងក្បាលគ្រាប់នុយក្លេអ៊ែររបស់ក្រុងព្យុងយ៉ាង មានដំណើរវិឌ្ឍន៍យ៉ាងលឿនក៏ដោយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
កូរ៉េខាងជើង ត្រូវបានគេជឿថា ជិតសម្រេចបានតាមគោលដៅរបស់ខ្លួនក្នុងការផលិតគ្រាប់មីស៊ីលបំពាក់ក្បាលគ្រាប់នុយក្លេអ៊ែរ ដែលអាចបាញ់ទៅដល់ទឹកដីអាមេរិក ហើយបញ្ហានេះ បានជំរុញឲ្យមានកំណើននៃភាពតានតឹងនៅក្នុងរយៈពេលប៉ុន្មានខែថ្មីៗនេះ។ ប្រធានាធិបតីអាមេរិក លោក ដូណាល់ ត្រាំ បាននិយាយថា ជម្រើសទាំងអស់ស្ថិតនៅលើតុចរចា ខណៈដែលលោកប្ដេជ្ញាថា មិនឲ្យកូរ៉េខាងជើងសម្រេចតាមគោលដៅរបស់ខ្លួននោះឡើយ។
ថ្លែងតាមទូរទស្សន៍ KBS កាលពីថ្ងៃម្សិលមិញ អនុរដ្ឋមន្ត្រីការពារជាតិ សុះ ឆូស៊ូក បាននិយាយថា ទាំងអាមេរិក និងកូរ៉េខាងត្បូង មិនជឿថា កូរ៉េខាងជើងនៅមិនទាន់ផលិតបានបច្ចេកវិទ្យាដាក់បញ្ចូលក្បាលគ្រាប់នុយក្លេអ៊ែរទាំងស្រុងនៅឡើយទេ។
លោក សុះ បានលើកឡើងថា កូរ៉េខាងជើងហាក់នៅតែបន្តទង្វើបង្កហេតុ ក្នុងនោះមានទាំងការសាកល្បងនុយក្លេអ៊ែរ ប៉ុន្តែ លោកមើលមិនឃើញថា កូរ៉េខាងជើងនឹងប្រថុយប្រថាននឹងការបង្កជម្លោះយោធានោះឡើយ៕