ប្រទេសចិនបានប្រកាសថា ខ្លួននឹងបញ្ឈប់ការនាំចូលរ៉ែដែក លោហៈធាតុ និងគ្រឿងសមុទ្រពីកូរ៉េខាងជើង ចាប់ពីថ្ងៃម្សិលមិញនេះ ដែលបង្ហាញថា ចិនអនុវត្តទៅតាមទណ្ឌកម្មថ្មីរបស់អង្គការសហប្រជាជាតិ បន្ទាប់ពីអាមេរិកដាក់សម្ពាធទៅលើក្រុងប៉េកាំង ឲ្យដាក់ពិន័យទៅលើក្រុងព្យុងយ៉ាងដែលជាសម្ព័ន្ធរបស់ខ្លួន ជុំវិញកម្មវិធីនុយក្លេអ៊ែរ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បន្តថា ការសម្រេចចិត្តបែបនេះរបស់ចិន ត្រូវបានប្រកាសឲ្យដឹងកាលពីថ្ងៃចន្ទ ក្រោយពីមេដឹកនាំអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន បានផ្ដោះផ្ដងសង្គ្រាមពាក្យសម្ដីនឹងគ្នាកាន់តែខ្លាំង ដែលជំរុញឲ្យអន្តរជាតិព្រួយបារម្ភអំពីវិបត្តិនាពេលខាងមុខ។
ក្រុងប៉េកាំងបានប្ដេជ្ញាអនុវត្តឲ្យបានពេញលេញទៅតាមទណ្ឌកម្មថ្មីបំផុតដាក់លើកូរ៉េខាងជើង បន្ទាប់ពីអាមេរិក បានចោទចិនថា មិនបានប្រឹងប្រែងឲ្យអស់ពីសមត្ថភាព ដើម្បីទប់ស្កាត់កូរ៉េខាងជើង ខណៈដែលក្រុងព្យ៉ាងពឹងផ្អែកយ៉ាងខ្លាំងទៅលើមហាយក្សសេដ្ឋកិច្ចអាស៊ីមួយនេះ ដើម្បីធ្វើឲ្យសេដ្ឋកិច្ចរបស់ខ្លួនបន្តមានជីវិត។
AFP បានដកស្រង់ខ្លឹមសារនៃសេចក្ដីប្រកាសព័ត៌មានរបស់ក្រសួងពាណិជ្ជកម្មចិន ដែលនិយាយលើវេបសាយខ្លួនថា រាល់ការនាំចូលរ៉ែធ្យូងថ្ម រ៉ែដែក លោហៈ និងគ្រឿងសមុទ្រ នឹងត្រូវហាមឃាត់ទាំងស្រុង ចាប់ពីថ្ងៃម្សិលមិញនេះ។ តាមការពិត ចិនបានប្រកាសផ្អាកការនាំចូលធ្យូងថ្មពីកូរ៉េខាងជើងរួចមកហើយកាលពីខែកុម្ភៈកន្លងមកនេះ។
តាមរយៈទណ្ឌកម្មថ្មីនេះ ក្រុងព្យុងយ៉ាងនឹងខាតបង់ថវិកា ១ពាន់លានដុល្លារក្នុងមួយឆ្នាំ នៅក្នុងជំនួញនាំចេញរ៉ែ និងគ្រឿងសមុទ្រចូលទៅប្រទេសចិន៕