មនុស្សរាប់រយនាក់ បានចេញដើរក្បួនដោយស្ងៀមស្ងាត់កាលពីថ្ងៃម្សិលមិញនេះតាមសង្កាត់មួយនៅភាគខាងលិចទីក្រុងឡុងដ៍ ជាទីដែលអគ្គិភ័យមួយកាលពីខែមិថុនាកន្លងមកនេះ បានសម្លាប់មនុស្សយ៉ាងតិច ៨០នាក់។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា មនុស្សប្រហែល ៣០០នាក់ បានប្រមូលផ្ដុំគ្នានៅជិតអគារ Grenfell Tower ដែលត្រូវភ្លើងឆាបឆេះបណ្ដាលឲ្យជនរងគ្រោះមួយចំនួនបាត់ខ្លួន និងកំណត់អត្តសញ្ញាណមិនបាន។
ក្រុមអ្នកដើរក្បួនទាំងនោះ បានកាន់បដាមានរូបថតអ្នកបាត់ខ្លួន និងអ្នកស្លាប់ មុននឹងពួកគេយករូបថតទាំងនោះទៅបិទនឹងជញ្ចាំង។ មនុស្សមួយចំនួនកាន់បដាដែលសរសេរថា “យុត្តិធម៌សម្រាប់អគារ Grenfell” ខណៈអ្នកដទៃទៀតកាន់ទៀនដុតភ្លើង។
មនុស្សយ៉ាងហោច ៨០នាក់ ត្រូវបានគេជឿថា បានស្លាប់នៅក្នុងអគ្គិភ័យនោះ ប៉ុន្តែ តួលេខអ្នកស្លាប់ចុងក្រោយ ត្រូវបានគេរំពឹងថានឹងនៅមានតទៅទៀត ខណៈដែលប៉ូលិសបន្តស្វែងរកនៅអគារនោះ៕
