មេដឹកនាំកូរ៉េខាងជើង លោក គីម ជុងអ៊ុន បានណែនាំអំពីផែនការបាញ់គ្រាប់មីស៊ីលទៅជិតកោះហ្គាំ ប៉ុន្តែ មានតម្រុយមកថា លោកនឹងពន្យាពេលបាញ់គ្រាប់មីស៊ីល។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់ប្រព័ន្ធឃោសនារដ្ឋរបស់ក្រុងព្យុងយ៉ាង នៅថ្ងៃនេះ។
យោងតាមទីភ្នាក់ងារព័ត៌មានរដ្ឋកូរ៉េខាងជើង KCNA លោក គីម បានត្រួតពិនិត្យមើលផែនការអស់រយៈពេលយូរ ហើយបានពិភាក្សាអំពីផែនការនេះជាមួយនឹងមន្ត្រីបញ្ជាការយោធាកាលពីថ្ងៃម្សិលមិញនេះ អំឡុងពេលលោក គីម ចុះត្រួតពិនិត្យមើលបញ្ជាការដ្ឋាននៃកងទ័ពយុទ្ធសាស្ត្រទទួលបន្ទុកផ្នែកគ្រាប់មីស៊ីលរបស់កូរ៉េខាងជើង។
KCNA បានដកស្រង់សម្ដីលោក គីម ដែលនិយាយថា ពួកចក្រពត្តិអាមេរិកកំពុងយកកលអន្ទាក់ ដោយសារតែតទល់ខាងយោធារបស់ពួកគេ។
AFP បានចុះផ្សាយថា ប៉ុន្តែ លោក គីម បង្ហាញតម្រុយថា លោកនឹងពន្យាផែនការបាញ់សាកល្បងគ្រាប់មីស៊ីលនេះទៅកាន់ដែនដីកោះអាមេរិកនៅមហាសមុទ្រប៉ាស៊ីហ្វិក ដោយថា លោកនឹងនឹងបន្តតាមដានបន្តិចទៀតនូវទង្វើដ៏ឆ្កួតលីលារបស់អាមេរិក។
លោក គីម ក៏បានជំរុញអាមេរិកឲ្យបញ្ឈប់ទង្វើបង្កហេតុដ៏គឃ្លើនរបស់ខ្លួនប្រឆាំងនឹងកូរ៉េខាងជើង ហើយមិនឲ្យបង្កហេតុយូរទៀតទេ៕
