មេដឹកនាំយោធាថៃនាយករដ្ឋមន្ត្រី ប្រាយុទ្ធ ចាន់អូចា គ្រោងទៅបំពេញទស្សនកិច្ចសេតវិមានអាមេរិកនៅខែតុលាខាងមុខនេះ។ នេះដោយយោងតាមការសេចក្ដីរាយការណ៍របស់ Reuters ដែលបានដកស្រង់សម្ដីរដ្ឋមន្ត្រីការបរទេសថៃ។
បើតាមរដ្ឋមន្ត្រីការបរទេសថៃ លោក ដន ប្រាម៉ូដវិណៃ ក្នុងគម្រោងដំណើរទស្សនកិច្ចនោះ បញ្ហាពាណិជ្ជកម្ម និងសន្តិសុខ នឹងត្រូវបានលើកយកទៅជជែកនៅក្នុងជំនួបជាមួយមេដឹកនាំអាមេរិកប្រធានាធិបតី ដូណាល់ ត្រាំ។
បើតាម Reuters នេះគឺជាសញ្ញាថ្មីបំផុតនៃទំនាក់ទំនងដ៏កក់ក្ដៅរវាងក្រុងបាងកក និងក្រុងវ៉ាស៊ីងតោន។
ថៃបានប្រកាសឲ្យដឹងជាសាធារណៈអំពីដំណើរទស្សនកិច្ចរបស់លោក ប្រាយុទ្ធ នៅថ្ងៃនេះ បន្ទាប់ពីដំណើរទស្សនកិច្ចទៅកាន់ប្រទេសថៃរបស់រដ្ឋមន្ត្រីការបរទេសអាមេរិក លោក Rex Tillerson កាលពីសប្ដាហ៍មុន។
នេះអាចកត់សម្គាល់បានថា នេះគឺជាដំណើរទស្សនកិច្ចកម្រិតខ្ពស់បំផុតពីសំណាក់មន្ត្រីអាមេរិក គិតចាប់តាំងពីពួកយោធាឡើងកាន់អំណាចនៅក្នុងរដ្ឋប្រហារកាលពីឆ្នាំ២០១៤៕