ពិធីសាសនាមួយដែលមានមនុស្សជាច្រើនចូលរួមនៅលើកោះម៉ាដីរ៉ា នៃប្រទេសប៉ទុយហ្គាល់ មានហេតុការណ៍បាក់រលំដើមឈើ ដែលមានអាយុកាលប្រមាណ២០០ឆ្នាំ បណ្តាលឲ្យស្លាប់មនុស្សអស់១៣ និងរងរបួសចំនួន៤៩នាក់។
នៅក្នុងវីឌីអូ ដែលផ្សព្វផ្សាយដោយសារព័ត៌មាន BBC នៅថ្ងៃនេះ បានបង្ហាញរូបភាពដែលហ្វូងមនុស្សកំពុងតែនៅជុំគ្នាធ្វើវិធីតាមបែបសាសនា នៅក្រោមដើមឈើតូចធំជាច្រើន ហើយមួយសន្ទុះក្រោយមកដើមឈើ ដែលមានអាយុកាលប្រមាណ២០០ឆ្នាំ បានបាក់រលំ អ្នកចូលរួមក៏នាំគ្នារត់ចេញ។
តាមរបាយការណ៍ដែលបានចុះផ្សាយដោយ BBC គឺកុមារពីរនាក់ ក៏ត្រូវបានសមត្ថកិច្ចរាយការណ៍បានស្លាប់នៅក្នុងហេតុការណ៍នោះដែរ។
ប្រធានាធិបតីនៃប្រទេសប៉ទុយហ្គាល់លោក Marcelo Rebelo de Sousa បានធ្វើដំណើរដល់កន្លែងកើតហេតុ ហើយថ្លែងថា លោកនិងពលរដ្ឋទាំងអស់មានការតក់ស្លុតចំពោះហេតុការណ៍នេះ ហើយបានប្រកាសធ្វើពិធីកាន់ទុក្ខរយៈពេល៣ថ្ងៃទូទាំងប្រទេស។ បន្ទាប់ពីទៅកន្លែងកើតហេតុ ប្រធានាធិបតីក៏បានទៅសួរសុខទុក្ខអ្នករងរបួសដោយសារហេតុការណ៍នេះនៅមន្ទីរពេទ្យបន្ត៕