ប្រធានាធិបតីឥណ្ឌូនេស៊ីបានអំពាវនាវឲ្យសហគមន៍ជាតិនិងអន្តរជាតិមានការរួបរួមគ្នា ក្នុងការដោះស្រាយបញ្ហាពួកជ្រុលនិយមកំពុងធ្វើសកម្មភាពវាយប្រហារ បង្កអសន្តិសុខនៅក្នុងសង្គម និងប៉ះពាល់ដល់ការទំនាក់ទំនងនិងសេដ្ឋកិច្ច។
លោក Joko Vidodo បានអំពាវនាវឲ្យមានការប្រជុំគ្នា ពីក្រុមពាក់ព័ន្ធទាំងអស់ ដើម្បីដោះស្រាយបញ្ហាការគំរាមកំហែងដោយពួកភេរវកម្ម ដើម្បីឆ្ពោះទៅភាពសុខដុមនៃសេរីភាពសាសនា និងការរស់នៅជាមួយក្រុមមនុស្សដែលមានប្រភពផ្សេងៗគ្នាបាន។
កាលពីថ្ងៃអង្គារសប្តាហ៍នេះ សមត្ថកិច្ចបានឃាត់ខ្លួនជនសង្ស័យ៥នាក់ ដែលមានសម្ភារមួយចំនួនជាធាតុផ្សំថា ត្រៀមនិងរៀបចំវាយប្រហារនៅរដ្ឋធានីចាការតា និងនៅក្បែរផ្ទះប្រធានាធិបតី។
ឥណ្ឌូនេស៊ីរងការគំរាមកំហែងបន្តបន្ទាប់កាន់តែខ្លាំងពីក្រុមភេរវកម្មតាំងពីបញ្ហាសាសនាកាលពីឆ្នាំមុន ដែលចោទថា អភិបាលរដ្ឋធានីចាការតា អ្នកកាន់សាសនាគ្រឹស្តបានបំពានដល់គម្ពីរ កូរ៉ាន់ជា គម្ពីររបស់សាសនាឥស្លាម រហូតដល់មានបាតុកម្មទ្រង់ទ្រាយធំ មានការបោះឆ្នោតជ្រើសរើសអភិបាលរដ្ឋធានីនោះជាថ្មី៕