ព្យុះទីហ្វុងហាតូ បានបោកបក់បំផ្លិចបំផ្លាញនៅភាគខាងត្បូងប្រទេសចិនកាលពីថ្ងៃម្សិលមិញនេះ ដោយបានសម្លាប់មនុស្ស ១០នាក់ បន្ទាប់ពីបោកបក់កាត់ទីក្រុងហុងកុង ដោយបង្កជាទឹកជំនន់លិចផ្លូវ និងបង្ខំឲ្យមនុស្សរាប់ពាន់នាក់ភៀសខ្លួនរកកន្លែងសុវត្ថិភាព។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ព្យុះនេះបានជំរុញឲ្យអាជ្ញាធរក្រុងហុងកុងដាក់ការព្រមានដល់កម្រិតទី ១០ ដែលជាកម្រិតធ្ងន់ធ្ងរបំផុត ដែលនេះគឺជាព្យុះទីហ្វុងដ៏កំណាចទី ៤ ដែលបានវាយប្រហារលើមជ្ឈមណ្ឌលហិរញ្ញវត្ថុមួយនេះ នៅក្នុងរយៈពេល ២០ឆ្នាំកន្លងមកនេះ។
មនុស្ស ៥នាក់ ត្រូវបានសម្លាប់នៅមជ្ឈមណ្ឌលល្បែងកម្សាន្តទីក្រុងម៉ាកាវ ជាទីដែលសារព័ត៌មានក្នុងស្រុកបានបង្ហាញនូវរថយន្តលិចលង់នៅក្នុងទឹក ហើយមនុស្សម្នាដើរតាមផ្លូវកាត់ទឹកជំនន់បង្កឡើងដោយទឹកភ្លៀង។
រដ្ឋាភិបាលក្រុងម៉ាកាវ បាននិយាយថា បុរសម្នាក់បានស្លាប់បន្ទាប់ពីរងរបួសដោយសារការខ្យល់បោកបក់ជញ្ជាំងដួលសង្កត់លើបុរសនោះ ហើយបុរសម្នាក់ទៀតត្រូវខ្យល់បោកបក់ធ្លាក់ពីអគារជាន់ទីបួន ខណៈដែលបុរសជាភ្ញៀវទេសចរចិនម្នាក់ទៀត ត្រូវខ្យល់បោកបក់ប៉ើងទៅបោកនឹងរថយន្តធំមួយ។ ចំណែកឯព័ត៌មានលម្អិតអំពីជនរងគ្រោះ ២នាក់ទៀត មិនត្រូវបានគេដឹងភ្លាមៗនោះទេ។
នៅឯទីក្រុងហុងកុង ប៉ូលិសនិយាយថា បុរសវ័យ ៨៣ឆ្នាំម្នាក់ បានស្លាប់បន្ទាប់ពីខ្យល់បោកបក់ធ្លាក់ចូលសមុទ្រ។ មនុស្សជាង ១២០នាក់ បានរងរបួស នៅពេលដែលទីក្រុងនេះរងខ្យល់ព្យុះ។
នៅឯខេត្តក្វាងទុង ទីភ្នាក់ងារព័ត៌មានស៊ិនហួរ បានរាយការណ៍ថា មនុស្សយ៉ាងហោច ៤នាក់ បានស្លាប់ ហើយមនុស្សជាង ២ម៉ឺន ៦ពាន់នាក់ទៀត បានរត់រកកន្លែងសុវត្ថិភាព៕