ប្រធានាធិបតីអាមេរិក លោក ដូណាល់ ត្រាំ បានប្រកាសថា មេដឹកនាំកូរ៉េខាងជើង លោក គីម ជុងអ៊ុន កំពុងចាប់ផ្ដើមគោរពអាមេរិកហើយ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
បើតាម AFP មេដឹកនាំអាមេរិកបានប្រកាសបែបនេះ បើទោះបីជាក្រុងព្យុងយ៉ាងបានទម្លាយឲ្យដឹងពីផែនការសម្រាប់អភិវឌ្ឍមីស៊ីលរបស់ខ្លួនកាលពីថ្ងៃម្សិលមិញ ហើយលោក គីម ថែមទាំងបញ្ជាឲ្យបង្កើនការផលិតមីស៊ីលក៏ដោយ។
លោក ត្រាំ បានថ្លែងបែបនេះ តែប៉ុន្មានម៉ោងក្រោយពីរដ្ឋមន្ត្រីការបរទេសអាមេរិក លោក Rex Tillerson បាននិយាយថា ការជជែកគ្នាជាមួយកូរ៉េខាងជើងជុំវិញកម្មវិធីអាវុធរបស់រដ្ឋឯកោមួយនេះ អាចនឹងទៅរួចនៅពេលអនាគតដ៏ខ្លីខាងមុខ។
សម្ដីក្រុមមេដឹកនាំអាមេរិក បានគូសបញ្ជាក់ឲ្យឃើញពីចំណុចផ្ទុយគ្នាទៅនឹងសង្គ្រាមពាក្យសម្ដីប៉ុន្មានសប្ដាហ៍ថ្មីៗនេះ បន្ទាប់ពីលោក ត្រាំ បានលើកឡើងពីការ “ការបាចផ្កាភ្លើង” ទៅលើកូរ៉េខាងជើង ហើយបានកើតឡើងចំពេលដែលភាពតានតឹងបានថមថយវិញ បន្ទាប់លោក គីម បានលុបចោលផែនការបាញ់គ្រាប់មីស៊ីលដាក់កោះហ្គាំ ដែនដីកោះអាមេរិកនៅមហាសមុទ្រប៉ាស៊ីហ្វិក។
ទោះជាយ៉ាងណា ក្រុងវ៉ាស៊ីងតោន ក៏បានដាក់ទណ្ឌកម្មថ្មីៗទៅលើក្រុមហ៊ុនចិន និងរុស្ស៊ី ដែលត្រូវបានសង្ស័យថា បានធ្វើជំនួញជាមួយកូរ៉េខាងជើង៕