តួលេខអ្នកស្លាប់ដោយសារខ្យល់ព្យុះទីហ្វុងហាតូ បានកើតឡើងដល់ចំនួនយ៉ាងតិច ១២នាក់ហើយមកដល់ថ្ងៃព្រហស្បតិ៍នេះ បន្ទាប់ពីព្យុះកំណាចនេះបានបោកបក់លើភាគខាងត្បូងចិន និងកាត់អគារខ្ពស់នៅទីក្រុងហុងកុង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
មនុស្ស ៨នាក់ បានស្លាប់នៅពេលព្យុះនេះបានបោកបក់ទៅលើមជ្ឈមណ្ឌលល្បែងកម្សាន្តទីក្រុងម៉ាកាវ ជាទីដែលសារព័ត៌មានក្នុងស្រុកបានចុះផ្សាយបង្ហាញនូវរថយន្តលិចលង់នៅក្នុងទឹក ហើយមនុស្សម្នាដើរកាត់ទឹកជំនន់នៅតាមដងផ្លូវ។
បុរសម្នាក់ បានស្លាប់បន្ទាប់ពីត្រូវខ្យល់បោកបក់ប៉ើងទៅផ្ទប់នឹងជញ្ជាំង បុរសម្នាក់ទៀតត្រូវខ្យល់បក់បោកធ្លាក់ពីជាន់ទី ៤ នៃអគារមួយ ហើយភ្ញៀវទេសចរចិនម្នាក់ ត្រូវខ្យល់បោកបក់ប៉ើងទៅបុកនឹងរថយន្ត។
រដ្ឋាភិបាលក្រុងម៉ាកាវបាននិយាយថា សពបុរសម្នាក់ ត្រូវបានគេរកឃើញនៅកន្លែងចតរថយន្តនៅព្រឹកថ្ងៃព្រហស្បតិ៍នេះ ប៉ុន្តែ ព័ត៌មានលម្អិតអំពីជនរងគ្រោះដទៃទៀត មិនត្រូវបានគេដឹងនោះឡើយភ្លាមៗនេះ។
នៅឯទីក្រុងហុងកុង ព្យុះទីហ្វុងហាតូ បានជំរុញឲ្យអាជ្ញាធរទីក្រុងនេះដំឡើងការប្រកាសអាសន្នដល់កម្រិតខ្ពស់បំផុត ដែលនេះគឺជាព្យុះកំណាចទី ៣ ដែលបានបោកបក់កាត់មជ្ឈមណ្ឌលហិរញ្ញវត្ថុមួយនេះ នៅក្នុងរយៈពេល ២០ឆ្នាំចុងក្រោយនេះ។
មនុស្សជាង ១២០នាក់ បានរងរបួស ខណៈដែលទីក្រុងនេះជួបនឹងព្យុះកំណាចបោកបក់លាយឡំជាមួយនឹងទឹកភ្លៀង។
នៅឯខេត្តក្វាងទុង នៅភាគខាងត្បូងចិន ទីភ្នាក់ងារព័ត៌មានស៊ិនហួ បានរាយការណ៍ថា មនុស្សយ៉ាងតិច ៤នាក់ បានស្លាប់ ហើយជាង ២ម៉ឺន ៦ពាន់នាក់ទៀត បានភៀសខ្លួនរកកន្លែងសុវត្ថិភាព។ លំនៅឋានជិត ២លានគ្រួសារ បានដាច់ភ្លើងមួយរយៈពេលខ្លី៕