ស្ថានទូតអាមេរិកប្រចាំនៅកម្ពុជា បានចោទសួរអំពីការប្ដេជ្ញាចិត្តរបស់រដ្ឋាភិបាលកម្ពុជាចំពោះលទ្ធិប្រជាធិតេយ្យ បន្ទាប់ពីរដ្ឋាភិបាលកម្ពុជាបានសម្រេចបិទអង្គការអាមេរិកមួយកាលពីថ្ងៃម្សិលមិញនេះ។
ក្រសួងការបរទេសកម្ពុជា បាននិយាយនៅក្នុងសេចក្ដីប្រកាសព័ត៌មានមួយកាលពីថ្ងៃម្សិលមិញថា រដ្ឋាភិបាលកម្ពុជា បានសម្រេចបិទវិទ្យាស្ថានជាតិប្រជាធិបតេយ្យ ហៅកាត់ថា NDI និងទុកពេល ៧ថ្ងៃឲ្យបុគ្គលបរទេសបម្រើការនៅអង្គការមួយនេះ ចាកចេញពីប្រទេសកម្ពុជា។
យោងតាមសេចក្ដីប្រកាសព័ត៌មាននោះ រដ្ឋាភិបាលកម្ពុជាបានចោទអង្គការអាមេរិកមួយនេះថា បានធ្វើប្រតិបត្តិការដោយខុសច្បាប់ស្ដីពីអង្គការមិនមែនរដ្ឋាភិបាល ដោយបានមិនចុះបញ្ជីជាមួយក្រសួងការបរទេសនោះឡើយ ហើយថែមទាំងចោទថា អង្គការនេះបានគាំទ្របក្សប្រឆាំង សម្រាប់ការប្រកួតប្រជែងក្នុងការបោះឆ្នោតជាតិនៅឆ្នាំក្រោយនេះ។
ការសម្រេចបែបនេះរបស់រដ្ឋាភិបាលកម្ពុជា ធ្វើឡើងបន្ទាប់ពីមានសេចក្ដីរាយការណ៍ចុះផ្សាយលើសារព័ត៌មានអនឡាញ Fresh News ថា អង្គការ NDI បានជួយរៀបចំជ្រោមជ្រែងគណបក្សសង្គ្រោះជាតិ សម្រាប់ផ្ដួលរំលំរដ្ឋាភិបាល នៅក្នុងការបោះឆ្នោតជាតិនៅឆ្នាំ២០១៨ខាងមុខ។
បន្ទាប់ពីការសម្រេចបែបនេះរបស់រដ្ឋាភិបាលកម្ពុជា ស្ថានទូតអាមេរិកប្រចាំនៅទីក្រុងភ្នំពេញ បានបង្ហោះសារនៅលើទំព័រហ្វេសប៊ុករបស់ខ្លួន កាលពីល្ងាចថ្ងៃម្សិលមិញ ដោយបានចោទសួរថា តើប្រទេសកម្ពុជាមានការប្ដេជ្ញាចិត្តចំពោះលទ្ធិប្រជាធិបតេយ្យដែរឬទេ?
ស្ថានទូតអាមេរិក បានអះអាងថា អ្វីដែលត្រូវបានចុះផ្សាយដោយសារព័ត៌មាន Fresh News ជុំវិញអង្គការ NDI នោះ មានភាពមិនត្រឹមត្រូវ និងមានភាពលម្អៀង។
ស្ថានទូតអាមេរិកបានអះអាងទៀតថា អង្គការ NDI មិនមែនបណ្ដុះបណ្ដាលតែគណបក្សប្រឆាំងទេ ប៉ុន្តែ អង្គការនេះក៏បានផ្ដល់ការបណ្ដុះបណ្ដាលទៅដល់ក្រុមមន្ត្រីគណបក្សកាន់អំណាច និងគណបក្សដទៃទៀតផងដែរ នៅក្នុងឆ្នាំ២០១៧នេះ។
ក្រៅពីផ្ដល់ការបណ្ដុះបណ្ដាលដល់គណបក្សនយោបាយ ស្ថានទូតអាមេរិកបញ្ជាក់ថា អង្គការ NDI ក៏បានធ្វើការយ៉ាងជិតស្និទ្ធជាមួយក្រសួងមហាផ្ទៃ ដើម្បីលើកកម្ពស់គណនេយ្យភាពរបស់រដ្ឋាភិបាល និងជាមួយគណៈកម្មាធិការជាតិរៀបចំការបោះឆ្នោត ដើម្បីជំរុញឲ្យដំណើរការបោះឆ្នោតមានភាពបើកចំហរច្រើន។
ជុំវិញការចោទថា អង្គការ NDI បានធ្វើប្រតិបត្តិការដោយល្មើសច្បាប់កម្ពុជានោះ ស្ថានទូតអាមេរិក បានបញ្ជាក់ថា អង្គការ NDI បានស្នើសុំចុះបញ្ជីនៅក្រសួងការបរទេសកម្ពុជា កាលពីថ្ងៃទី២១ ខែកញ្ញា ឆ្នាំ២០១៦ ប៉ុន្តែ រដ្ឋាភិបាលកម្ពុជាពុំបានឆ្លើយតបនោះទេចាប់តាំងពីពេលនោះមក។ ការណ៍ក្រសួងការបរទេសកម្ពុជាមិនឆ្លើយតបនឹងសំណើរបស់អង្គការ NDI បែបនេះ ស្ថានទូតអាមេរិកចាត់ទុកជាការរំលោភទៅលើមាត្រា ១៤ នៃច្បាប់ស្ដីពីសមាគម និងអង្គការមិនមែនរដ្ឋាភិបាល។
មាត្រា ១៤ នៃច្បាប់សមាគម និងអង្គការមិនមែនរដ្ឋាភិបាល ដែលបានចូលជាធរមានតាំងពីថ្ងៃទី១២ ខែសីហា ឆ្នាំ២០១៥នោះ បានចែងថា ក្រសួងការបរទេសកម្ពុជា ត្រូវពិនិត្យលើខ្លឹមសារនៃសំណុំលិខិត ហើយត្រូវសម្រេចយល់ព្រម ឬមិនយល់ព្រមចុះអនុស្សរណៈជាមួយសមាគម ឬអង្គការមិនមែនរដ្ឋាភិបាលបរទេស យ៉ាងយូរ ៤៥ថ្ងៃនៃថ្ងៃធ្វើការ៕
