រដ្ឋរ៉ាក់ឃីននៅភាគខាងលិចប្រទេសភូមា បានបង្ហាញពីវិបត្តិសិទ្ធិមនុស្ស ដែលប៉ះពាល់ដល់សហគមន៍មូស្លីម ឬក៏ជនជាតិរ៉ូហ៊ីងយ៉ានៅទីនោះ។ នេះដោយយោងតាមការចុះផ្សាយរបស់សារព័ត៌មាន Channel News Asia ដោយបានដកស្រង់សម្ដីអតីតអគ្គលេខាធិការអង្គការសហប្រជាជាតិ លោក កូហ្វី អាណាន់។
លោក កូហ្វី អាណាន់ កំពុងស្ថិតក្នុងដំណើរបំពេញទស្សនកិច្ចនៅប្រទេសភូមា ក្នុងនាមលោកជាប្រធានគណៈកម្មការផ្ដល់ប្រឹក្សាយោបល់សម្រាប់រដ្ឋរ៉ាក់ឃីន។ គណៈកម្មការនេះ នឹងវាយតម្លៃទៅលើស្ថានភាពរំលោភសិទ្ធិមនុស្សជនជាតិភាគតិចរ៉ូហ៊ីងយ៉ា។
ក្នុងរបាយការណ៍កម្រាស់ ៦៣ទំព័ររបស់ខ្លួន គណៈកម្មការនេះបាននិយាយថា សហគមន៍មូស្លីមរ៉ូហ៊ីងយ៉ានៅរដ្ឋរ៉ាក់ឃីន បានធ្លាកទៅក្នុងការរំលោភសិទ្ធិមនុស្ស ដោយសារតែការរើសអើង និងការចាត់ទុកជនជាតិនេះថា គ្មានរដ្ឋពិតប្រាកដ និងមិនមែនជាពលរដ្ឋភូមា។
របាយការណ៍នោះ បានចង្អុលបង្ហាះថា ប្រជាជនប្រហែល ១០ភាគរយក្នុងចំណោមប្រជាជនគ្មានប្រទេសពិតប្រាក់នៅលើពិភពលោក កំពុងរស់នៅក្នុងប្រទេសភូមា ហើយជនជាតិរ៉ូហ៊ីងយ៉ា បានក្លាយជាសហគមន៍មិនមានរដ្ឋពិតប្រាកដធំបំផុតនៅលើពិភពលោក។
ក្រុមមួយនេះ មានសមាជិក ៩រូប ក្នុងនោះមានជនបរទេស ៣រូប និងមន្ត្រីភូមា ៦រូប។ ពួកគេធ្វើសន្និដ្ឋានអាណត្តិមួយឆ្នាំរបស់ខ្លួន បន្ទាប់ពីបញ្ជូនអនុសាសន៍ទៅរដ្ឋាភិបាលភូមា៕