រដ្ឋាភិបាលសិង្ហបុរី ត្រូវបានរដ្ឋាភិបាលអាមេរិកជូនដំណឹងអំពីផែនការដាក់ទណ្ឌកម្មទៅលើក្រុមហ៊ុនចំនួន ២ ដែលចុះបញ្ជីនៅសិង្ហបុរី មុននឹងក្រុមហ៊ុនទាំងពីរត្រូវបានពិន័យ។ នេះដោយយោងតាមការចុះផ្សាយរបស់សារព័ត៌មាន Channel News Asia។
សារព័ត៌មាននេះ បានឲ្យបន្ថែមថា ក្រុមហ៊ុនទាំងពីរនោះ មានក្រុមហ៊ុន Transatlantic Partners និងក្រុមហ៊ុន Velmur Management។
ក្រសួងការបរទេសសិង្ហបុរី បានប្រាប់អ្នកសារព័ត៌មានថា រដ្ឋាភិបាលសិង្ហបុរីកំពុងតែស៊ើបអង្កេតលើក្រុមហ៊ុនទាំងពីរនេះ។
ក្រសួងរតនាគារជាតិអាមេរិក កាលពីថ្ងៃអង្គារកន្លងមកនេះ បានដាក់ទណ្ឌកម្មលើក្រុមហ៊ុនចំនួន ១០ និងបុគ្គលិក ៦រូប ដែលជាផ្នែកមួយនៃការឆ្លើយបទៅនឹងកម្មវិធីនុយក្លេអ៊ែររបស់កូរ៉េខាងជើង ដែលរំលោភទៅនឹងសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ ក្នុងចំណោមក្រុមហ៊ុនទាំងនោះ ក៏មានក្រុមហ៊ុនចំនួន ២ ដែលចុះបញ្ជីនៅសិង្ហបុរី និងជនជាតិរុស្ស៊ី ៣នាក់៕