ក្រុមប្រជាជនថៃរាប់រយនាក់ដែលគាំទ្រអតីតនាយករដ្ឋមន្ត្រីថៃ អ្នកស្រី យីងឡាក់ ស៊ីណាវ៉ាត់ បានចាប់ផ្ដើមប្រមូលផ្ដុំនៅខាងក្រៅតុលាការកំពូលនៅទីក្រុងបាងកក នៅព្រឹកថ្ងៃនេះ តែប៉ុន្មានម៉ោងប៉ុណ្ណោះមុននឹងតុលាការនេះចាប់ផ្ដើមសម្រេចលើរឿងក្ដីមួយប្រឆាំងនឹងអ្នកស្រី យីងឡាក់ ដែលអាចឲ្យអ្នកស្រីប្រឈមមុខនឹងទោសជាប់ពន្ធនាគារ ១០ឆ្នាំ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Rueters បានចុះផ្សាយបន្តថា សាលក្រមដែលត្រូវបានរង់ចាំយ៉ាងយូរនេះ អាចបង្កឲ្យមានភាពតានតឹងនៅក្នុងប្រទេសថៃឡើងវិញ ខណៈដែលប្រទេសនេះកំពុងមានការបាក់បែកខាងនយោបាយស្រាប់ទៅហើយនោះ។
តម្រួតថៃនៅទីក្រុងបាងកក បាននិយាយថា កម្លាំងតម្រួតប្រហែល ៤ពាន់នាក់ ត្រូវបានដាក់ពង្រាយនៅឯតុលាការកំពូល និងតាមទីតាំងត្រួតពិនិត្យ។
អ្នកស្រី យីងឡាក់ ដែលត្រូវបានទម្លាក់ពីអំណាចនៅក្នុងរដ្ឋប្រហារយោធាមួយកាលពីខែឧសភាឆ្នាំ២០១៤ ត្រូវបានចោទប្រកាន់ដោយរដ្ឋាភិបាលយោធាបច្ចុប្បន្នថា បានធ្វើឲ្យរដ្ឋខាតបង់ប្រាក់ដល់ទៅ ៨ពាន់លានដុល្លារ ជុំវិញកម្មវិធីស្រូវអង្ករអំឡុងរដ្ឋបាលរបស់អ្នកស្រី។ កម្មវិធីស្រូវអង្ករនោះ ត្រូវបានគេមើលឃើញថា រដ្ឋាភិបាលអ្នកស្រី យីងឡាក់ បានប្រមូលទិញស្រូវពីប្រជាជនក្នុងតម្លៃខ្ពស់ជាងទីផ្សារដល់ទៅ ៥០ភាគរយ។
ទោះជាយ៉ាងណាក៏ដោយ អ្នកស្រី យីងឡាក់ បានបដិសេធថា អ្នកស្រីមិនមានទោសកំហុសដូចទៅនឹងការចោទប្រកាន់នោះឡើយ ដោយអ្នកស្រីថា អ្នកស្រីទទួលខុសត្រូវលើការរៀបចំគោលនយោបាយ ប៉ុន្តែ មិនមែនការគ្រប់គ្រងផែនការស្រូវអង្ករនោះប្រចាំថ្ងៃនោះទេ៕
