សេដ្ឋកិច្ចថៃត្រូវបានរាយការណ៍ថា នឹងមានកំណើន ៣.៥ភាគរយនៅក្នុងឆ្នាំនេះ ដែលតួលេខព្យាករនេះ ខុសគ្នាទៅនឹងតួលេខព្យាករកាលពីខែមេសាកន្លងមកដែលត្រូវប៉ាន់ប្រមាណថា សេដ្ឋកិច្ចប្រទេសនេះនឹងមានកំណើនត្រឹម ៣.២ភាគរយប៉ុណ្ណោះ។ នេះដោយយោងតាមការចុះផ្សាយរបស់សារព័ត៌មានថៃបាងកក ប៉ុស្តិ៍ ដែលបានឃើញរបាយការណ៍របស់ធនាគារពិភពលោកកាលពីថ្ងៃម្សិលមិញនេះ។
ក្រៅពីព្យាករកំណើនសេដ្ឋកិច្ចក្នុងឆ្នាំនេះ ធនាគារពិភពលោកក៏បានប្រមើលឃើញថា សេដ្ឋកិច្ចថៃនឹងមានកំណើនដល់ទៅ ៣.៦ភាគរយ នៅឆ្នាំ២០១៨ខាងមុខ ខណៈដែលការព្យាករកាលពីខែមេសា បានប៉ានប្រមាណថា មានកំណើនត្រឹមតែ ៣.៣ភាគរយប៉ុណ្ណោះ។
ធនាគារពិភពលោក បាននិយាយនៅក្នុងសេចក្ដីប្រកាសព័ត៌មានមួយថា ការងើបឡើងវិញនៃសេដ្ឋកិច្ចថៃ កំពុងមានសន្ទុះឡើងវិញ ខណៈដែលចំណូលបានមកពីវិស័យកសិកម្ម បានកើនឡើង ក្រោយពីរដូវរាំងស្ងួត និងបន្ទាប់មានកំណើនក្នុងវិស័យឧស្សាហកម្ម និងទេសចរណ៍។
សេដ្ឋកិច្ចថៃ មានកំណើនដល់ទៅ ៣.៧ភាគរយនៅក្នុងត្រីមាសទីពីរ បើធៀបទៅនឹងត្រីមាសទីពីរក្នុងឆ្នាំ២០១៦កន្លងមក ជាតួលេខកំណើនលើសពីការរំពឹង ដែលធ្វើឲ្យទីភ្នាកងាររៀបចំផែនការរបស់ប្រទេសនេះ ដំឡើងការព្យាករកំណើនសេដ្ឋកិច្ចនៅឆ្នាំ២០១៧នេះ ពីចន្លោះ ៣.៣ភាគរយ ទៅ ៣.៨ភាគរយ ទៅចន្លោះ ៣.៥ភាគរយ ទៅ ៤ភាគរយ៕