កាសែត ឌឹ ខេមបូឌា ដេលី (The Cambodia Daily) មានប្រតិកម្មតបថា ការបន្តបែកធ្លាយព័ត៌មានអំពីរឿងពន្ធដារ ទៅកាន់ប្រព័ន្ធផ្សព្វផ្សាយដែលស្និទ្ធនឹងរដ្ឋាភិបាលជាបន្តបន្ទាប់ គឺជាសកម្មភាពមួយបង្ហាញថា រដ្ឋាភិបាលមានបំណងឈប់ឲ្យសារព័ត៌មានរបស់ខ្លួនមានវត្តមានតទៅទៀត ជាជាងការសម្របសម្រួលគ្នារឿងពន្ធដារ។
សេចក្តីថ្លែងការណ៍មួយរបស់ សារព័ត៌មាន ឌឹ ខេមបូឌា ដេលី ចុះថ្ងៃទី២៨ ខែសីហានេះ បានឲ្យដឹងថា ចាងហ្វាងបោះពុម្ព លោកស្រី ឌឹប៉ូរ៉ា គ្រីសឺ ស្ទៀល (Deborah Krisher-Steele) បានបដិសេធចំពោះតម្លាភាពនៃការទារពន្ធរបស់រដ្ឋាភិបាលកម្ពុជាមកលើស្ថាប័នខ្លួន ហើយថាសកម្មភាពបែកធ្លាយព័ត៌មានជាបន្តបន្ទាប់ ទៅកាន់ប្រព័ន្ធផ្សព្វផ្សាយគាំទ្ររដ្ឋាភិបាលចុះផ្សាយនោះ គឺជាសកម្មភាពជំរុញការបិទ ឌឹ ខេមបូឌា ដេលី។
សរសេរនៅក្នុងសេចក្តីថ្លែងការនោះ លោកស្រី គ្រីសឺស្ទៀល មានប្រសាសន៍ថា៖ «រដ្ឋាភិបាលកម្ពុជាគ្រប់គ្រងប្រព័ន្ធពន្ធដារដោយមិនមានស្តង់ដារវិជ្ជាជីវៈ ភាពសម្ងាត់ ឬក៏មានដំណើរការជាមូលដ្ឋានច្បាប់។ ការបែកធ្លាយព័ត៌មានជាបន្តបន្ទាប់ អំពីករណីរបស់ពួកយើង ទៅកាន់ប្រព័ន្ធផ្សព្វផ្សាយស្និទ្ធរដ្ឋាភិបាល បង្ហាញថាវាជាការបង្ខំឲ្យស្ថាប័នពួកយើងត្រូវបិទ ជាជាងការព្យាយាមសម្របសម្រួលស្មោះត្រង់ បើសិនជាយើងត្រួវបង់ពន្ធពិតប្រាកដមែននោះ»។
ក្រៅពីនេះស្ថាប័នព័ត៌មានអន្តរជាតិមួយនេះ ក៏អំពាវនាវដល់សមាគមអន្តរជាតិ ក៏ដូចជារដ្ឋាភិបាលជុំវិញពិភពលោកជួយ និងធ្វើយ៉ាងណាកុំឲ្យស្ថាប័នមួយនេះត្រូវបានបិទនៅពេលខាងមុខ។
ឆ្លើយតបទៅនឹងបញ្ហានេះ អ្នកនាំពាក្យក្រសួងព័ត៌មាន លោក អ៊ុក គឹមសេង មានប្រសាសន៍ថា ប្រសិនបើកាសែត ឌឹ ខេមប៉ូឌា ដេលី មានបំណងចង់ស្វែងរកការពិត ឬតវ៉ាអ្វីទាក់ទិននឹងបញ្ហានេះ សារពត៌មាននេះគួរតែសរសេរលិខិតជាផ្លូវការទៅកាន់ក្រសួងព័ត៌មាន ហើយលោកថា មិនគួរណាចុះផ្សាយតាមរយៈប្រព័ន្ធផ្សព្ធផ្សាយឡើយ ព្រោះវាបណ្តាលឲ្យមានភាពចលាចល និងយល់ច្រឡំនៅក្នុងសង្គម។
លោកមានប្រសាសន៍ថា៖ «មិនធ្វើជាលិខិតពាក់ព័ន្ធនឹងការយកពន្ធ រឿងគាត់ គាត់ត្រូវឆ្លើយតបជាផ្លូវការ មិនមែនទៅចុះផ្សាយចឹងទេ វាអត់មានល្បែងផ្លោងគ្នាតាមសារព័ត៌មានចឹងទេ បើគាត់ចង់រកអ្វីដែលជាការពិត ឧទាហរណ៍ថា ការបង់ពន្ធបង់អី គាត់ត្រូវធ្វើការឆ្លើយតបជាលាយលក្ខណ៍អក្សរជាមួយគេ ត្រូវមកជួបជាមួយស្ថាប័នពាក់ព័ន្ធ ព្រោះអីមិនអាចបោះសម្តីទៅមកៗចឹង វាធ្វើឲ្យសភាពការណ៍ហ្នឹងវ៉ល់»។
កាលពីថ្ងៃទី៤ សីហាកន្លងទៅ រដ្ឋាភិបាលបានចេញព័ត៌មានសម្ងាត់មួយបង្ហាញថា ស្ថាប័នកាសែត ឌឹ ខេមប៉ូឌា ដេលី បានជំពាក់ពន្ធរដ្ឋាភិបាល រយៈពេល១០ឆ្នាំ សរុបជាថវិកាចំនួន២ម៉ឺនលានរៀល ឬស្មើនឹង៦.៣លានដុល្លាអាមេរិក។ ព័ត៌មានបន្តថា កាសែតនេះត្រូវបង់ពន្ធឲ្យបានមុនថ្ងៃទី៤ កញ្ញា ២០១៧ បើពុំនោះទេ ស្ថាប័ននេះនឹងត្រូវបិទ។
ព័ត៌មានជុំវិញករណីការខកខានបង់ពន្ធរបស់សារព័ត៌មាន ខេមបូឌា ដេលី នេះ ត្រូវបានសារព័ត៌មានស្និទ្ធជាមួយរដ្ឋាភិបាល Fresh News បានទម្លាយឯកសារជាបន្តបន្ទាប់។
ពាក់ព័ន្ធករណីនេះ កាសែត ឌឹ ខេមប៉ូឌា ដេលី ក៏បានសរសេរផងដែរថា ការបែកធ្លាយឯកសារមុនបែបនេះ គឺជាសកម្មភាពរំលោភច្បាប់ពន្ធដារ មាត្រា៩៤ នៃរដ្ឋធម្មនុញប្រទេសកម្ពុជា ហើយថារដ្ឋាភិបាលគួរតែធ្វើការស៊ើបអង្កេតលើករណីនេះ។
កាសែត ឌឹ ខេមប៉ូឌា ដេលី គឺជាសារពត៌មានអន្តរជាតិ ចេញផ្សាយជាភាសាអង់គ្លេសនៅក្នុងប្រទេសកម្ពុជា មានកំណើតតាំងពីឆ្នាំ១៩៩៣៕
រាយការណ៍បន្ថែមដោយ កញ្ញា ថាញ់ ចន្ទសុធារី
