អូស្ត្រាលីនៅថ្ងៃអង្គារនេះ រៀបចំការបណ្តុះបណ្តាលពីការប្រឆាំងអំពើភេរវកម្មបង្កដោយពួកក្រុម IS ស្របពេលដែលហ្វីលីពីនកំពុងតែទទួលរងការគំរាមកំហែងខ្លាំង ដែលពួកក្រុមភេរវកម្មកំពុងតែឡោមព័ទ្ធទីក្រុងម៉ារ៉ាវីនៅភាគខាងត្បូង។
ទីក្រុងម៉ារ៉ាវី ត្រូវពួកក្រុមឧទ្ទាមសហការជាមួយក្រុម IS វាយចូលលុកលុយ និងឡោមព័ទ្ធប្រមាណជាង១០០ថ្ងៃមកនេះ នៅមិនទាន់អាចដោះស្រាយបាននៅឡើយ។
លោកស្រី Julie Bishop រដ្ឋមន្ត្រីការបរទេសអូស្ត្រាលីថ្លែងថា នៅពេលថ្មីៗ លោកស្រីបានថ្លែងទៅកាន់ប្រធានាធិបតីហ្វីលីពីន លោក ឌូទើតេ ពីការរៀបចំបណ្តុះបណ្តាលសមត្ថភាពយោធា ដើម្បីប្រយុទ្ទប្រឆាំងជាមួយពួកក្រុមឧទ្ទាម។ នេះបើតាមទីភ្នាក់ងារព័ត៌មាន AFP។
អូស្ត្រាលីបញ្ជាក់ថា នឹងបណ្តុះបណ្តាលជំនាញដូចដែលពួកគេកំពុងប្រើប្រាស់នៅក្នុងការប្រឆាំងពួក IS នៅក្នុងប្រទេសអ៊ីរ៉ាក់។
អូស្ត្រាលីគឺជាសម្ព័ន្ធមួយរបស់អាមេរិកក្នុងការចូលរួមប្រឆាំងពួក IS នៅក្នុងប្រទេសអ៊ីរ៉ាក់ ហើយបច្ចុប្បន្នកម្លាំងរបស់អូស្ត្រាលីចំនួន៧៨០នាក់ កំពុងមានវត្តមាននៅក្នុងតំបន់មជ្ឈឹមបូព៌ា៕